Türkiyə Yaşıl Hidrogen İstehsalçıları Assosiasiyasının rəhbəri iqlim investisiyalarını artırmağa çağırıb
Ankara, 22 noyabr, AZƏRTAC
Qlobal istiləşmə təkcə son 10 ildə qlobal iqtisadiyyata 3,5 trilyon dollar ziyan vurub. Üstəlik, 2023-cü ildə birbaşa olaraq ətraf mühitdən iqtisadi itkilərin həcmi 700 milyard dollar həcmində qiymətləndirilir. Vəziyyətdən çıxış yolu yaşıl transformasiya kimi görünür.
AZƏRTAC xəbər verir ki, bunu jurnalistlərə açıqlamasında Türkiyənin Yaşıl Hidrogen İstehsalçıları Assosiasiyasının (H2DER) rəhbəri Yusuf Günay BMT-nin İqlim Dəyişikliyi üzrə Çərçivə Konvensiyasının Tərəflər Konfransının 29-cu sessiyasının əhəmiyyətini şərh edərkən deyib.
Y. Günay iqlim dəyişikliyi nəticəsində dünyanın müxtəlif yerlərində təbii fəlakətlərin sayının artmasına diqqət çəkib.
H2DER rəhbəri 2030-cu ilə qədər dünyada bərpaolunan enerji mənbələri (RES) obyektlərinin gücünün üç dəfə artırılması ilə bağlı bəyan edilmiş hədəfi xatırladıb. “Düşünürəm ki, bu kifayət etməyəcək. Bərpaolunan enerji obyektlərinin gücü ən azı beş dəfə artmalıdır”, -deyə H2DER rəhbəri qeyd edib.
Onun sözlərinə görə, Türkiyə son onilliklər ərzində yaşıl enerji sahəsində də əhəmiyyətli irəliləyişlər əldə edib.
Y.Günay xatırladıb ki, hələ 2001-ci ildə Türkiyədə bərpaolunan enerji obyektlərinin ümumi quraşdırılmış gücü cəmi 30 min MVt idisə, hazırda bu rəqəm dəfələrlə artıb.
“Bərpaolunan enerji obyektlərinə ilkin investisiyalar yüksək olsa da, xərclər tezliklə özünü doğruldur. Ona görə də bu sahəyə, xüsusilə günəş və külək enerjisinə investisiyaların artırılması lazımdır. Bundan əlavə, elektroliz yolu ilə istehsal olunan və zərərli istixana qazları buraxmayan yaşıl hidrogenə diqqət yetirmək vacibdir”, - deyə türk assosiasiyasının rəhbəri bildirib.
Onun fikrincə, yaşıl hidrogen xüsusilə yüksək temperatur şəraiti tələb edən sənayelərdə fəal şəkildə istifadə olunarsa, iqlim dəyişikliyi ilə mübarizə daha effektli olar.
Ramin Abdullayev
AZƏRTAC-ın xüsusi müxbiri
Ankara
Bölmənin digər xəbərləri
