Türkiyənin ən yaxşı və uzun məsafəli velosiped marşrutları
Bakı, 19 avqust, AZƏRTAC
Türkiyə dünyanın ən inkişaf etmiş turizm mərkəzlərindən biridir. Qardaş ölkə turistləri iqlimi, tarixi və mədəni zənginliyi, müxtəlif çeşiddə dadlı mətbəxi, böyük sahilləri cəlb edir. Bu ölkədə xarici qonaqlarda maraq doğuran səbəblərdən biri də velosiped marşrutlarıdır.
AZƏRTAC xəbər verir ki, Türkiyədəki qısa və uzun məsafəli velosiped yolları ölkənin təbii gözəllikləri, tarixi, mədəniyyəti və mətbəxindən faydalanmaq üçün əlverişli imkanlar yaradır. Milli və beynəlxalq eko-etiketləri özündə əks etdirən marşrutlara həmçinin düşərgə və qlampinq sahələri, təhlükəsiz parkinq sahələrində velosipedlərin təmizlənməsi və təmiri xidmətləri göstərən velosiped dostu otellər daxildir.
Türkiyənin uzun məsafəli velosiped marşrutlarından biri də Berqamadan Efesə gedən "UNESCO marşrutu"dur. Antik Perqamon Şəhəri, İzmirin Dikili Limanından Türkiyəyə daxil olan bu marşrutun 45-ci kilometrindəki ilk dayanacaqdır. Marşrut daha sonra İzmirin İzmir Quş Cənnəti, Karşıyaka, Alsancak, Seferihisar, Sığacık, Urla və Alaçatı kimi gözəl yerlərindən keçərək UNESCO-nun Ümumdünya Mədəni İrsi siyahısına daxil olan başqa bir antik Efes şəhərində sona çatır.
Ədirnədən İstanbula qədər uzanan “Trakya marşrutu”u isə bu məkanın təbii gözəllikləri, dadlı yeməkləri, üzüm bağları, əfsanəvi şərabları və mehriban insanları ilə seçilən Ədirnədən başlayır. Osmanlı İmperatorluğunun ikinci paytaxtı olan şəhər, hanlar, hamamlar, körpülər və saraylar kimi tarixi tikililərə malikdir və Trakya bölgəsinin mərkəzidir. Memar Sinan tərəfindən inşa edilən və 2011-ci ildə UNESCO-nun Ümumdünya Mədəni İrs Siyahısına daxil edilən Səlimiyə məscidi şəhərin görməli yerlərindən biridir. Ədirnədən sonra yamyaşıl meşə yolları ilə Kırklarelinə doğru davam edərək, burada 19-cu əsr Osmanlı mülki memarlığının parlaq nümunələri ilə tanış olmaq mümkündür.
İstanbuldan Kayseriyə qədər olan “Anadolu marşrutu” ilə Kocaeli, Sakarya və Əskişəhərdən keçir. Əskişəhərin tarixi Odunpazarı bölgəsi mədəni zənginliyi və müxtəlif muzeyləri ilə diqqət cəlb edir. Gözəl ənənəvi evləri, dar küçələri, məscidləri, fəvvarələri və kiçik meydanları ilə rayon mərkəzi 2012-ci ildə Türkiyənin UNESCO-nun Ümumdünya Mədəni İrs Siyahısına daxil edilib. Nevşehirdə sizi dünyanın ən füsunkar coğrafi bölgələrindən biri olan gözəl mənzərəli Kapadokya qarşılayır.
Türkiyədə uzun məsafəli velosiped sürmək üçün başqa bir seçim uzun məsafəli mədəniyyət marşrutu olan Avrasiya Yoludur. Marşrut Türkiyəyə Ədirnədən daxil olur, daha sonra İstanbul və Bursadan keçərək cənuba doğru gedir. Yamyaşıl bağları ilə tanınan Beykozdan başlayaraq, Poyrazköy və Anadolu Fənəri ilə velosiped sürərək İstanbulun şimal ucuna doğru irəliləyir. İstanbuldan sonra yol Osmanlı İmperatorluğunun keçmiş paytaxtları olan Bursa və Biləcikdən keçərək Kütahyaya, oradan da Afyonkarahisara aparır. Ləzzətli mətbəxi ilə də məşhur olan şəhərin görməli yerləri arasında Afyon qalası və İscehisar Pəri Bacaları var.
Tarixlə zəngin, müstəsna iqlim şəraiti ilə bərəkətli və təbii gözəllikləri ilə valeh edən digər marşrut Antalyadan Mersinə olan “Aralıq dənizi marşrutu”dur.
Bu uzun məsafəli marşrut Antalyanın məşhur Kaleiçi Yaxta Limanından başlayır və Pamfiliyanın ən əhəmiyyətli liman şəhəri olan qədim Side şəhərinə qədər davam edir. Marşrut üzrə gözəl mənzərəli sahil xətti boyunca davam edərək Alanyaya çatır. 500 kilometrdən sonra isə Aralıq dənizinin sevimli liman şəhərlərindən biri olan Mersində tantuni, cezerye kimi müxtəlif yerli yeməklərdən ləzzət almaq mümkündür.
Bölmənin digər xəbərləri
