Türkiyənin Milli Kəşfiyyat Təşkilatının rəhbəri Liviya rəsmiləri ilə görüşüb
Bakı, 5 avqust, AZƏRTAC
Türkiyə Milli Kəşfiyyat Təşkilatının rəhbəri İbrahim Kalın Ankarada Liviya Milli Birlik Hökumətinin müdafiə naziri vəzifəsini icra edən Əbdülsəlam Zubi və Baş nazir Əbdülhəmid Dibeybənin milli təhlükəsizlik üzrə müşaviri İbrahim Dibeybə ilə görüşüb.
AZƏRTAC “TRT Haber”ə istinadla xəbər verir ki, görüş zamanı Liviya və regional inkişaf məsələləri, Liviya-Türkiyə əməkdaşlığının davam etdirilməsi istiqamətində atılacaq addımlar və Liviyada sabitliyin qorunması üçün görülən işlər müzakirə olunub. İbrahim Kalın Türkiyənin Liviyada sülh və sabitliyin qorunmasına verdiyi dəstəyi davam etdirəcəyini vurğulayıb.
Türkiyə Milli Kəşfiyyat Təşkilatının rəhbəri, həmçinin Liviyanın daxili işlər naziri İmad et-Trablusi ilə görüşüb. Tərəflər Liviyada təhlükəsizlik və sabitliyin gücləndirilməsi üçün atıla biləcək əlavə addımları müzakirə ediblər. İbrahim Kalın Liviyanın təhlükəsizliyinə və inkişafına dəstəyin davam edəcəyini, Türkiyənin Liviya və Şimali Afrikada terrorizmə, insan alverinə və qanunsuz fəaliyyətlərə qarşı mübarizə aparmağa sadiq olduğunu bildirib.
Bölmənin digər xəbərləri
