TÜRKMƏNİSTAN TÜRKİYƏYƏ VERDİYİ ELEKTRİK ENERJİSİNİN HƏCMİNİ İKİ DƏFƏ ARTIRACAQDIR

19.02.2004 [13:16]
Çap et
A⁺ A^-

AZƏRTAC-ın müxbiri xəbər verir ki, bu qərar Türkmənistan Prezidenti Saparmurad Niyazovun Türkiyənin energetika və təbii qaynaqlar naziri Hilmi Gülərlə fevralın 18-də keçirilmiş görüşündə qəbul edilmişdir. Onlar 2004-cü ildə ixrac olunacaq elektrik enerjisinin həcminin artırılması haqqında niyyət protokolu imzalamışlar.

S.Niyazov görüş zamanı demişdir: “Tükmənistanın enerji ehtiyatının genişlənməkdə olan həcmi onun ixracını artırmağa imkan verir. Türkmənistan İrana və Əfqanıstana da elektrik enerjisi verir”. Türkmənistan-İran-Türkiyə enerji körpüsü 2003-cü il dekabrın 12-də işə salınmışdır. İki ay ərzində 90 milyon kVt saat elektrik enerjisi ixrac edilmişdir.

Görüşdə Türkmənistandan İran aşırı Türkiyəyə qaz verilməsi məsələsi də müzakirə olunmuşdur. İran 1998-ci ildən 200 kilometrlik Körpəcə-Kurd-Kui qaz kəməri vasitəsi ilə Türkmənistandan qaz idxal edir.

Türkiyə naziri demişdir ki, onun ölkəsi Türkmənistandan qaz idxalı məsələsinin tezliklə həllində maraqlıdır.