UEFA arbitrlərə videoyardım sistemini İtaliya və ABŞ yığmalarının matçında testləşdirəcək
Bakı 13 noyabr, AZƏRTAC
Avropa Futbol Assosiasiyaları İttifaqının (UEFA) mətbuat xidmətinin yaydığı məlumata görə, bu təşkilat arbitrlərə videoyardım (VAR) sistemini ilk dəfə İtaliya və ABŞ yığmaları arasında yoldaşlıq matçı zamanı testləşdirəcək. İtaliya və ABŞ yığmaları arasında matç noyabrın 20-də Belçikada keçiriləcək.
AZƏRTAC xəbər verir ki, UEFA-nın İcraiyyə Komitəsi tərəfindən sentyabr ayında qəbul edilmiş qərara əsasən, 2019/2020-ci illər mövsümündə Çempionlar Liqasında, 2020-ci il Avropa Çempionatında, 2020/2021-ci illər mövsümünün Avropa Liqasında və 2021-ci il Millətlər Liqasının final mərhələsində VAR sistemindən istifadə ediləcək. Bu sistem istifadəyə verilməzdən əvvəl onu xüsusi olaraq seçilmiş bir neçə matçda testləşdirəcəklər.
Arbitrlərə videoyardım sistemi 2018-ci il dünya çempionatı matçlarında tətbiq edilib. VAR sistemindən bir sıra milli çempionatlarda da istifadə edilir.
Qeyd olunur ki, testləşdirmə çoxkanallı yayıma əsla təsir göstərməyəcək.
Bölmənin digər xəbərləri
