Ukraynada elan olunmuş “Xocalı ayı” tədbirlərinə Xarkovda start verilmişdir
Bakı, 15 fevral (AZƏRTAC). Ukrayna Azərbaycanlı Gənclər Birliyi, İslam Konfransı Gənclər Forumu və Ukrayna Azərbaycanlıları Konqresinin Xarkov vilayət təşkilatının birgə təşkilatçılığı ilə Ukraynada elan olunmuş “Xocalı ayı” tədbirlərinə Xarkovda start verilmişdir.
AZƏRTAC xəbər verir ki, Xarkov vilayət administrasiyası rəsmilərinin, Azərbaycan diasporunun fəallarının, yerli KİV nümayəndələrinin iştirak etdikləri “Xocalı ayı” çərçivəsində ilk anma mərasimində 20 ilin keçməsinə baxmayaraq, beynəlxalq təşkilatlar tərəfindən Xocalı soyqırımına hüquqi siyasi qiymətin verilməməsi tarixi ədalətsizlik kimi qiymətləndirilmişdir.
Əvvəlcə iştirakçılar Azərbaycanın Milli Qəhrəmanı Viktor Seryoginin Xarkovdakı xatirə lövhəsinin önünə tər çiçəklər qoymuşlar.
Ukrayna Azərbaycanlıları Konqresinin Xarkov vilayət təşkilatının sədri Qurban Abbasov 20 il bundan əvvəl ermənilərin Xocalı şəhərində törətdikləri kütləvi qırğınları son iki əsrdə Azərbaycan xalqına qarşı həyata keçirilmiş işğalçılıq və soyqırımı siyasətinin məntiqi davamı kimi dəyərləndirmişdir.
Diasporumuzun fəalları Hacı Amil Abdullayev, Kifayət Cəfərova, Sabir İsmayılov, Xarkov Dostluq Cəmiyyətinin sədri Murad Ömərov və digər soydaşlarımız ermənilərin işğalçılıq siyasəti nəticəsində Azərbaycan torpaqlarının 20 faizinin işğal olunmasından, təcavüz nəticəsində 1 milyondan çox insanın öz doğma yurd-yuvalarından didərgin salınmasından danışmışlar. Natiqlər vurğulamışlar ki, erməni qəsbkarlarının Xocalı şəhərində törətdikləri vəhşilikləri bəşər tarixinin ən amansız salnaməsidir.
Sonra Heydər Əliyev Fondunun xətti ilə hazırlanmış “Xocalı soyqırımı” filmi nümayiş etdirilmişdir. Mərasim iştirakçıları ermənilərin Xocalıda uşaqlara, qadınlara, qocalara qarşı həyata keçirdikləri vəhşiliklərə dair ətraflı məlumat əldə etmişlər.
Filmə baxandan sonra “Xocalıda baş verən qanlı faciə insanlığa yönəlmiş bəşəri bir cinayətdir”, - deyən Xarkov Şəhər Radasının deputatı Alla Bobeyka, Ümumukrayna Gürcü Cəmiyyətinin sədri Zurab Kiriya və bir sıra xalqların diaspor rəhbərləri 20 il ötməsinə baxmayaraq dünya birliyinin və beynəlxalq təşkilatların belə bir bəşəri cinayətə hüquqi siyasi qiymət verməməsini tarixi ədalətsizlik kimi qiymətləndirmişlər.
Mərasimdə Ukrayna Azərbaycanlı Gənclər Birliyinin sədri Anar Tahirov və digər gənclər çıxış edərək, Heydər Əliyev Fondunun vitse-prezidenti Leyla xanım Əliyevanın təşəbbüsü ilə “Xocalıya ədalət” beynəlxalq kampaniyası çərçivəsində dünyanın bir çox ölkələrində həyata keçirilən tədbirlərin erməni vandalizminin dünya ictimaiyyətinə çatdırılmasında müstəsna rol oynadığını vurğulamışlar. Onlar gec-tez dünya birliyi və beynəlxalq təşkilatlar tərəfindən ermənilərin Xocalıda törətdikləri soyqırımına siyasi-hüquqi qiymətin veriləcəyinə əminliklərini bildirmişlər.
Bölmənin digər xəbərləri
