Ukraynanın Azərbaycandakı səfirliyi: Ukrayna ilə Azərbaycan arasında münasibətlər strateji tərəfdaşlıq münasibətləridir
Bakı, 24 avqust, AZƏRTAC
Ukrayna ilə Azərbaycan arasında münasibətlər strateji tərəfdaşlıq münasibətləridir. İkitərəfli münasibətlərin geniş müqavilə hüququ bazası müxtəlif sahələrdə əməkdaşlıq üçün etibarlı təməl yaradır. Bu iki dövlət arasında hər hansı problemlər yoxdur. Bu gün ölkələrimiz arasında ikitərəfli əməkdaşlığın ayrı-ayrı sahələrində yaradılmış müvafiq hökumətlərarası komissiyalar, işçi qruplar uğurla fəaliyyət göstərir. Prezidentlər Şurası Ukrayna ilə Azərbaycan arasında münasibətlərin inkişafı prosesində, şübhəsiz, mühüm əlaqələndirici rol oynayır. Bu ali səviyyəli orqanın mütəmadi keçirilən iclaslarının gündəliyinə Ukrayna-Azərbaycan əməkdaşlığının ən aktual məsələləri çıxarılır.
AZƏRTAC xəbər verir ki, bu fikirlər Ukraynanın müstəqillik qazanmasının 24-cü ildönümü ilə əlaqədar Ukraynanın Azərbaycandakı səfirliyi tərəfindən yayılmış press-relizdə öz əksini tapıb.
Press-relizdə qeyd edilir ki, 2014-cü il iyunun 7-də Azərbaycan Milli Məclisinin sədri Oqtay Əsədovun Prezident Pyotr Poroşenkonun inauqurasiya mərasimində iştirak etmək üçün Ukraynaya işgüzar səfəri Ukrayna ilə Azərbaycan arasında ikitərəfli münasibətlərin yüksək səviyyədə olmasına dəlalət edir.
Məlumatda deyilir: “Azərbaycan Respublikasının dinamik inkişafı, beynəlxalq aləmdə artan nüfuzu ilk növbədə siyasi sahədə, eləcə də ticari-iqtisadi, energetika, tikinti, nəqliyyat, aerokosmik və hərbi-texniki sahələrdə Ukrayna-Azərbaycan əməkdaşlığının daha da inkişaf etdirilməsi və dərinləşdirilməsi üçün əlavə imkanlar yaradır. 2014-cü ilin yekunlarına görə, Ukrayna ilə Azərbaycan arasında xarici ticarətin həcmi 674,2 milyon ABŞ dollarına bərabər olub. Ukrayna və Azərbaycan mədəni-humanitar sahədə də fəal əməkdaşlıq edir. Bu baxımdan, təhsil sahəsində, o cümlədən ali təhsil sahəsində əməkdaşlığın perspektivli olması xüsusi qeyd edilməlidir. İki ölkənin ali məktəbləri arasında sıx əlaqələr bu əməkdaşlığın səciyyəvi cəhətidir. Bakı Slavyan Universitetinin (BSU) fəaliyyəti ayrıca qeyd edilməlidir. BSU Ukraynanın bir sıra ali məktəbləri ilə sıx əməkdaşlıq etməklə yanaşı, Azərbaycanda Ukrayna mədəniyyətinin, ədəbiyyatının, bu ölkənin tarixinin və ənənələrinin inkişaf etdirilməsi və öyrənilməsi üzrə fəal iş aparır. BSU nəzdində Ukrayna Mədəniyyət Mərkəzi fəaliyyət göstərir. Azərbaycan Respublikasında Ukrayna mədəniyyətini əbədiləşdirmək və populyarlaşdırmaq məqsədilə burada Ukraynanın görkəmli xadimlərinin abidələri, o cümlədən Zaqatala şəhərində Taras Şevçenkonun barelyefi (rəsmi açılış mərasimi 1979-cu ilin iyun ayında olub), Bakı şəhərinin Qaradağ rayonunda 2006-cı ildə Lesya Ukrainkanın büstü, 2008-ci il iyunun 30-da Azərbaycan paytaxtının mərkəzi rayonlarından birində T.Q.Şevçenkonun abidəsinin rəsmi açılış mərasimində Ukrayna və Azərbaycan prezidentləri iştirak ediblər. 2009-cu ilin aprel ayında Ukrayna Prezidentinin Azərbaycana rəsmi səfəri çərçivəsində Azərbaycan paytaxtının mərkəzi hissəsində 1919-1920-ci illərdə Ukrayna Xalq Respublikasının xüsusi diplomatik missiyasının yerləşdiyi binanın fasadında vurulmuş xatirə lövhəsinin açılışı olub. Bununla yanaşı, Kiyevdə Azərbaycan xalqının ümummilli lideri Heydər Əliyevə abidə qoyulub, İrpen şəhərində isə akademik Zərifə Əliyeva adına park açılıb, bu parkda onun şərəfinə abidə ucaldılıb. İrpen şəhərinin mərkəzi küçələrindən biri akademik Zərifə Əliyevanın adını daşıyır. 2015-ci il aprelin 28-də İrpen şəhərindəki 12 nömrəli məktəbə akademik Z.Əliyevanın adının verilməsi münasibətilə keçirilən təntənəli mərasimdə Azərbaycan Milli Məclisinin və Ukrayna Ali Radasının deputatları - “Ukrayna-Azərbaycan” dostluq qrupunun üzvləri iştirak ediblər”.
Bölmənin digər xəbərləri
