Ukraynanın “ECO orqanik” şirkəti “Ekol Mühəndislik Xidmətləri” QSC ilə əməkdaşlıqda maraqlıdır
Bakı, 12 aprel (AZƏRTAC). “Ekol Mühəndislik Xidmətləri” Qapalı Səhmdar Cəmiyyətində (QSC) Ukraynanın “ECO orqanik” şirkətinin nümayəndələri ilə görüş keçirilmişdir. Görüşdə “ECO orqanik” şirkətini Ukraynanın Azərbaycandakı sabiq səfiri Boris Aleksenko, idarə heyəti sədrinin məsləhətçisi Eduard Deredyuk təmsil etmişlər.
“ECO orqanik” şirkətinin nümayəndələri QSC haqqında məlumatlı olduqlarını və qurumun Azərbaycanda çirklənmiş torpaqların təmizlənməsi sahəsində böyük nailiyyətlər əldə etdiyini vurğulayaraq, əməkdaşlıqda maraqlı olduqlarını bildirmişlər. Görüşdə ukraynalı həmkarlar torpaqların bioremediasiyasında “ECO orqanik” şirkətinin orqanik maddəsindən istifadə olunması təklifini irəli sürmüşlər. Qərara alınmışdır ki, şirkətin torpaqların təmizlənməsində istifadə etdiyi orqanik maddənin QSC-də sınağı keçirilsin və bu sınağın nəticələri növbəti görüşlərdə müzakirə olunsun.
Tədbirdə QSC-nin baş direktoru Ramil Əliyev ekoloji layihələrin həyata keçirilməsi sahəsində əməkdaşlıq etməyə hazır olduqlarını və bunun planetimizin ümumi ekoloji vəziyyətinin yaxşılaşdırılmasına xidmət edəcəyini qeyd etmişdir.
Bölmənin digər xəbərləri
