Ukraynaya rekord sayda dronla hücum edilib, ölən və xəsarət alanlar var
Kiyev, 18 may, AZƏRTAC
Mayın 18-nə keçən gecə Rusiya 273 drondan istifadə etməklə, Ukraynaya bu ilin rekord sayda dron hücumunu həyata keçirib.
AZƏRTAC xəbər verir ki, bu barədə Ukrayna Silahlı Qüvvələrinin Hərbi Hava Qüvvələri məlumat yayıb.
Hücum Rusiyanın bir gecədə Ukraynaya atdığı dronların sayına görə rekorddur. Bundan öncə, fevralın 23-də 267 dronla hücum qeydə alınmışdı.
Hərbi Hava Qüvvələrinin məlumatına görə, Rusiya ordusu beş istiqamətdən - Bryansk, Kursk, Oryol vilayətləri, həmçinin Millerovo və Primorsko-Axtarsk bölgələrindən hücuma keçib.
Mayın 18-i səhər saatlarına olan məlumata görə, 88 dron vurulub. Hücum Kiyev, Dnepropetrovsk və Donetsk vilayətlərini əhatə edib.
Rusiya Krımdan üç “İskəndər-M” və “KN-23” ballistik raketlərindən də istifadə edib.
Kiyev vilayət Hərbi Administrasiyasının rəhbəri Nikolay Kalaşnikinin sözlərinə görə, Obuxov rayonunda bir qadın aldığı xəsarətlərdən ölüb. 61 yaşlı kişi, 59 yaşlı qadın və 4 yaşlı uşaq da yaralanıb və xəstəxanaya yerləşdirilib. Zərərçəkənlərin vəziyyəti orta ağırdır.
Emil Hüseynli
AZƏRTAC-ın xüsusi müxbiri
Kiyev
Bölmənin digər xəbərləri
