Bakı, 12 dekabr, AZƏRTAC

Azərbaycanın dövlətçilik tarixində dərin iz qoymuş Ümummilli Lider Heydər Əliyevin vəfatından 22 il ötür. Bu illər ərzində ölkəmiz onun siyasi irsinin işığında əzmlə irəliləyərək qısa müddətdə əsrə bərabər yol qət edib.

Bu dövr Azərbaycan üçün həm də tarixi ədalətin bərpası ilə yadda qalıb. Çoxəsrlik tariximizdə misli görünməmiş Vətən müharibəsi və ardınca həyata keçirilən antiterror tədbirləri nəticəsində respublikamızın ərazi bütövlüyü və suverenliyi tam təmin olunub. Bununla yanaşı, ölkəmiz beynəlxalq əhəmiyyətli enerji və nəqliyyat layihələrinin təşəbbüskarı və aparıcı iştirakçısı kimi regional və qlobal miqyasda siyasi-iqtisadi mövqelərini daha da möhkəmləndirib.

Bu nailiyyətlərin əsasını Ulu Öndərin əbədi ideyaları, Prezident İlham Əliyevin qətiyyətli qərarları, dəyişən qlobal reallıqlara uyğun siyasəti və çevik diplomatik fəaliyyəti təşkil edir. Bu gün Azərbaycanın səsi bütün beynəlxalq platformalarda daha güclü eşidilir, üçrəngli Bayrağımız ən yüksək zirvələrdə dalğalanır.

Milli dirçəlişin banisi

Azərbaycanın müasir tarixində qazanılan böyük uğurlar Ulu Öndər Heydər Əliyevin adı ilə sıx bağlıdır. Onun 1969-cu ildən başlayan və 30 ildən artıq davam edən rəhbərliyi dövründə ölkəmiz milli dirçəliş və intibah dövrünü yaşayıb.

Heydər Əliyevin hakimiyyətə gəlişi Azərbaycanın həyatında əsaslı dəyişikliklər yaratdı. Respublika canlanma mərhələsinə qədəm qoydu, genişmiqyaslı quruculuq işləri və inkişaf prosesi başladı. Bakıda o dövrün nadir sənaye müəssisələri – məişət kondisionerləri və dərin dəniz özülləri zavodları istifadəyə verildi. Memarlıq inciləri olan “Gülüstan” sarayı və Heydər Əliyev Sarayı inşa edildi, Yeni Əhmədli və “Günəşli” kimi iri yaşayış massivləri salındı. Kənd təsərrüfatında əhəmiyyətli nailiyyətlər əldə olundu ki, bu da əhalinin həyat səviyyəsini xeyli yaxşılaşdırdı.

Ulu Öndər Heydər Əliyev hələ sağlığında əfsanələşmişdi və nadir dövlət xadimlərindən sayılırdı. Dünyanın tanınmış simaları onu siyasətdə patriarx, tarixin gedişinə təsir edə bilən güclü şəxsiyyət hesab edirdilər.

Əminliklə demək olar ki, 1970-1980-ci illər Azərbaycan tarixində xalqımızın milli ideyalarının – azad, müstəqil və suveren dövlət qurmaq arzularının formalaşmasına möhkəm bünövrə yaratdı.

Xalqının qüdrətli müdafiəçisi

Ulu Öndər Heydər Əliyev Azərbaycan tarixinin ən görkəmli şəxsiyyətlərindən biridir və xalqımız onunla haqlı olaraq fəxr edir. Həyatı xalqı ilə dərindən bağlı olan Ümummilli Lider dövlətçilik tariximizdə unudulmaz rəhbər, qüdrətli Lider və fədakar insan kimi iz qoyub. Şübhəsiz ki, o, Azərbaycanı qəlbən sevən və ömrünü Vətəninin tərəqqisinə həsr edən dahi bir şəxsiyyət idi.

Ümummilli Lider Heydər Əliyev keçmiş SSRİ-nin ən ali rəhbər orqanlarından biri olan Siyasi Büronun üzvü, həmçinin SSRİ Nazirlər Soveti sədrinin birinci müavini vəzifəsinə qədər yüksəlmişdi. Ulu Öndərin belə mötəbər siyasi zirvəyə yüksəlməsi Azərbaycanın inkişafı üçün böyük imkanlar açdı. O, nüfuzundan və tutduğu vəzifələrin imtiyazlarından istifadə edərək Azərbaycana bir çox mühüm ittifaq layihələrini yönəltdi.

O dövrdə Heydər Əliyevin yorulmaz fəaliyyəti, qətiyyətli addımları və fitri təşkilatçılıq istedadı onun nüfuzunu daha da artırdı. Lakin buna rəğmən ona qarşı paxıllıq və qısqanclıq da güclənirdi. Xüsusilə mənsəbpərəst Mixail Qorbaçov onu siyasi meydandan uzaqlaşdırmağa çalışır, əleyhinə çirkin kampaniyalar aparırdı.

Ümummilli Lider Heydər Əliyev ölkə rəhbərliyi ilə ciddi fikir ayrılığı səbəbindən vəzifəsindən istefa verdikdən sonra erməni şovinistləri Azərbaycana qarşı ərazi iddiaları irəli sürdülər və Qarabağda separatizm baş qaldırdı. 1990-cı il yanvarın 20-də sovet ordusu Bakıda qanlı qırğın törətdi. O dövrdə də, bu gün də çoxları əmindir ki, əgər Heydər Əliyev həmin vaxt rəhbərlikdə olsaydı, nə Qarabağ problemi, nə Qara Yanvar faciəsi, nə də digər hadisələr baş verərdi.

Xaosdan sabitliyə: Müasir Azərbaycanın qurucusu

1990-cı illərin əvvəlləri Azərbaycan üçün çox mürəkkəb bir dövr idi. Bu vəziyyətə biganə qala bilməyən Ulu Öndər Heydər Əliyev Moskvadan Vətənə qayıtmaq qərarı verdi. Lakin o dövrdəki iqtidar Heydər Əliyevin Bakıya gəlməsinə mane olduğundan Ulu Öndər doğma Naxçıvana üz tutdu. Ümummilli Lider Naxçıvanı erməni təcavüzündən və siyasi təlatümlərdən qorumağı bacardı. Üçrəngli Bayrağımızı ilk dəfə Naxçıvanda ucaldan Ulu Öndər burada Yeni Azərbaycan Partiyasının əsasını qoydu. Ümummilli Liderin muxtar respublikanın rəhbəri olaraq qəbul etdiyi strateji və qətiyyətli qərarlar Azərbaycanın gələcək taleyinə mühüm təsir göstərdi.

Müstəqilliyin ilk illərində ölkə xaos, anarxiya və vətəndaş müharibəsi təhlükəsi ilə üzləşmişdi. 1993-cü ilin yayında vəziyyət böhran həddinə çatdı. Xalqın çağırışı ilə Ulu Öndər iyunun 9-da Naxçıvandan Bakıya gəldi və ölkəni xilas etmək üçün məsuliyyəti öz üzərinə götürdü.

Ulu Öndər Heydər Əliyev qısa zamanda ölkədə sabitliyi bərpa etdi və müasir milli dövlət quruculuğu prosesini başlatdı. Onun rəhbərliyi ilə milli maraqlar ön plana çıxarıldı, xarici siyasət prinsipləri müəyyənləşdirildi və ictimai-siyasi sabitlik təmin edildi. Bu isə ölkədə genişmiqyaslı infrastruktur və quruculuq işlərinə şərait yaratdı.

Ordu quruculuğu sahəsində də mühüm addımlar atıldı. Ulu Öndər cəbhə bölgələrinə səfərlər edir, əsgərlərlə görüşərək onların mənəvi ruhunu yüksəldirdi. Bunun nəticəsində düşmənin ölkəmizə qarşı yeni işğal planları dəf edildi və təhlükələrin qarşısı alındı.

Eyni zamanda, Azərbaycanın enerji və nəqliyyat infrastrukturunda böyük layihələr reallaşdırıldı. Bakı-Tbilisi-Ceyhan neft kəməri istifadəyə verildi, ardınca Bakı-Tbilisi-Ərzurum qaz kəməri, Bakı-Tbilisi-Qars dəmir yolu və Cənub Qaz Dəhlizi inşa edildi. Bu transmilli layihələr ölkəmizi beynəlxalq arenada mühüm aktora çevirdi.

Uğurlu inkişafdan möhtəşəm Zəfərə

Ümummilli Lider Heydər Əliyev artıq aramızda olmasa da, onun parlaq ideyaları bu gün də Azərbaycanın inkişaf yolunu işıqlandırır. Prezident İlham Əliyev Ulu Öndərin strategiyasını qətiyyətlə davam etdirərək ölkəmizi yeni zirvələrə aparır, qlobal siyasətin mürəkkəb məqamlarını nəzərə alaraq milli maraqları qoruyur. Onun titanik fəaliyyəti nəticəsində Azərbaycan güclü dövlətə və beynəlxalq aləmdə nüfuzlu söz sahibinə çevrilib.

Xalq öz Liderinə inanır və onu dəstəkləyir. Bu həmrəyliyin və inamın ən parlaq təcəssümü 44 günlük Vətən müharibəsində və uğurlu antiterror tədbirləri nəticəsində qazanılan möhtəşəm Zəfərdir. Prezident İlham Əliyev quruculuq işlərində də böyük qətiyyət və əzmkarlıq nümayiş etdirir. İşğaldan azad olunmuş ərazilərdə infrastruktur bərpa olunur, yaşayış kompleksləri tikilir, yenilərinin təməli qoyulur. Bu proseslər Böyük Qayıdışın uğurlu perspektivindən xəbər verir. İndiyədək yüzlərlə ailə doğma yurda qovuşub və “Böyük Qayıdış” Proqramı uğurla həyata keçirilir.

Heç şübhəsiz, bütün bu uğurların əsasını Ulu Öndər Heydər Əliyevin uzaqgörən siyasəti, müdrik strategiyası və milli dövlətçilik prinsipləri təşkil edir. Bu nailiyyətlər göstərir ki, Azərbaycanın gələcəyi daha güclü, firavan və sabit bir dövlət olaraq qorunacaq, xalqımız isə hər zaman öz Liderinə güvənərək inkişaf yolunda addımlamağa davam edəcək.