Ulu öndər Heydər Əliyevin ideyaları əbədiyaşardır
Bakı, 10 dekabr, İbrahim Əsədov, AZƏRTAC
Dekabrın 10-da Bakı Dövlət Universitetində (BDU) ümummilli lider Heydər Əliyevin əziz xatirəsini anma mərasimi keçirilib.
Əvvəlcə tədbir iştirakçıları Ulu Öndərin xatirəsini ehtiramla yad ediblər.
Mərasimdə BDU-nun rektoru, Milli Məclisin deputatı, akademik Abel Məhərrəmov ulu öndər Heydər Əliyevin doğma Vətən və xalq qarşısındakı əvəzsiz tarixi xidmətlərindən, böyük xilaskarlıq rolundan danışıb.
Ölkəmizdə hüquqi, demokratik, dünyəvi dövlət quruculuğunda ulu öndər Heydər Əliyevin müstəsna rolunu qeyd edən rektor vurğulayıb ki, Azərbaycan xalqı xoşbəxtdir, çünki onun müdrik rəhbər Heydər Əliyev kimi Ümummilli Lideri var.
Akademik A. Məhərrəmov müdrik dövlət xadimi Heydər Əliyev siyasətinin uğurlu nəticələrindən bəhs edərək dahi rəhbərin ideyalarının hazırda Prezident İlham Əliyev tərəfindən uğurla həyata keçirildiyini bildirib. Qeyd olunub ki, bu gün Azərbaycan çox sürətlə inkişaf edir.
Rektor qüdrətli şəxsiyyət Heydər Əliyevin elm, təhsil sahəsinə göstərdiyi böyük diqqət və qayğıdan da söz açıb.
Ulu Öndərin həyat və fəaliyyətinin ayrı-ayrı məqamlarını əks etdirən film göstərilib.
Tədbirdə Azərbaycan Respublikası Milli Məclisi sədrinin birinci müavini Ziyafət Əsgərov bildirib ki, dahi rəhbər Heydər Əliyev müasir Azərbaycan dövlətinin qurucusu və memarıdır. Ulu Öndərin müdrik siyasəti nəticəsində Qərbin iri neft şirkətləri ilə uğurlu danışıqlar aparılmaqla 1994-cü il sentyabrın 20-də bütün dünyada “Əsrin müqaviləsi” adı ilə tanınan neft kontraktının imzalandığını xatırladan Z.Əsgərov respublikamızda bu sahədə qazanılan nailiyyətlərdən bəhs edib.
Milli Məclisin sosial siyasət komitəsinin sədri Hadi Rəcəbli ulu öndər Heydər Əliyevin zəngin dövlət idarəçiliyi təcrübəsinin əhəmiyyətindən danışıb.
Milli Məclisin deputatları Siyavuş Novruzov, Fəzail İbrahimli görkəmli siyasi və dövlət xadimi Heydər Əliyev şəxsiyyətinin böyüklüyündən söz açıb, Ümummilli Liderin ideyalarının əbədiyaşar olduğunu vurğulayıblar.
Bölmənin digər xəbərləri
