Ümummilli Lider Heydər Əliyevin rəhbərliyi ilə dövlətçilik salnaməsinə şanlı səhifələr yazılıb - deputat
Bakı, 12 dekabr, AZƏRTAC
Bu gün Azərbaycanın beynəlxalq münasibətlər sistemində artan rolu, möhkəmlənən mövqeyi, etibarlı tərəfdaş kimi nüfuz qazanması, qalib ölkə olaraq yaratdığı yeni reallıqlar hər birimizdə qürur hissi doğurur. Təbii ki, bu uğurlar böyük səylərin, qətiyyətin, düzgün qurulan siyasətin nəticəsidir. 1993-cü ilin iyunundan başlanan inkişaf yolu Azərbaycanı daim zirvələrə aparır. Bu yol Heydər Əliyev yoludur. Azərbaycanda müstəqil dövlətçiliyi yaradan və yaşadan Ulu Öndər Heydər Əliyevin siyasətidir. Dövlətçilik salnaməsinə şanlı səhifələr Ümummilli Lider Heydər Əliyevin siyasi xətti, rəhbərliyi ilə yazılıb.
Bu fikirləri AZƏRTAC-a müsahibəsində Milli Məclisin deputatı Malik Həsənov söyləyib.
Deputat qeyd edib ki, Azərbaycanın müstəqillik tarixinin ayrı-ayrı mərhələlərini müqayisə etdikdə ölkələrin inkişafında, xalqın gələcəyə daha böyük inamla addımlamasında lider amilinin rolu daha aydın görünür. Müstəqilliyin bərpasının ilk illərində respublikaya rəhbərlik edənlərin şəxsi ambisiyalarını dövlət maraqlarından üstün tutmaları səbəbindən Azərbaycan müstəqilliyini itirmək, bir dövlət olaraq dünya xəritəsindən silinmək təhlükəsi ilə üz-üzə qaldı. Belə bir vaxtda xalq ayağa qalxdı, üzünü Azərbaycanı xilas edəcək Liderə - Ulu Öndər Heydər Əliyevə tutdu. Azərbaycan xalqı xoşbəxt xalqdır ki, ölkəmizin müasir tarixinin qısa bir kəsiyində Ulu Öndər Heydər Əliyevin rəhbərliyi ilə öz müstəqil dövlətini qurdu və Prezident İlham Əliyevin liderliyi ilə tarixi qələbələrə imza ataraq güclü, suveren və müstəqil Azərbaycanımızın firavan gələcəyinə doğru zəfər yolunu inamla davam etdirir.
Malik Həsənov diqqətə çatdırıb ki, Azərbaycanın hər bir uğuru Heydər Əliyev siyasətinin təntənəsidir: “Ümummilli Lider Azərbaycanı daim zirvələrdə görmək istəyirdi. Bu, onun Vətənə, xalqa bağlılığından irəli gəlirdi. Müstəqilliyin bərpasının ilk illərində Azərbaycanı xaosdan, anarxiyadan, iqtisadi böhrandan xilas edən Ulu Öndər Heydər Əliyevin ölkəmizə rəhbərlik etdiyi illər xalqımızın böyük əziyyətlər bahasına öz müstəqilliyini əbədi və dönməz etdiyi taleyüklü mərhələdir. Ümummilli Lider bütün dünyada Azərbaycanın rəmzi kimi qəbul edilir. Xalqımız onun əziz xatirəsini həmişə uca tutur və minnətdarlıqla anır”.
Milli Məclisin deputatı vurğulayıb ki, Prezident İlham Əliyev Ümummilli Liderin yaratdığı möhkəm təmələ əsaslanaraq dövlətimizi strateji hədəflərə doğru uğurla aparır: “Onun müəyyənləşdirdiyi yol xəritəsi güclü iqtisadi potensialın formalaşdırılmasını, müasir cəmiyyət quruculuğunu, qarşıya qoyulmuş bütün vəzifələri yerinə yetirmək qüdrətində olan Silahlı Qüvvələrin yaradılmasını, beynəlxalq aləmlə bərabərhüquqlu, qarşılıqlı etimada və əməkdaşlığa əsaslanan əlaqələrin inkişaf etdirilməsini və bütün bunların son hədəfi kimi Azərbaycanın müstəqil siyasətini, ərazi bütövlüyünün və suverenliyinin bərpasını nəzərdə tuturdu. Son 20 il çoxəsrlik milli dövlətçilik tariximizə bənzəri olmayan dövr kimi yazıldı. Bu illər Azərbaycan xalqının həyatında silsilə qələbələr, misli görünməmiş yüksəliş və tərəqqi dövrü kimi xarakterizə olunur. 2020-ci ildə Azərbaycanı tarixi Zəfərinə qovuşduran, dünyaya qalib ölkə kimi təqdim edən Prezident İlham Əliyev ata vəsiyyətini yerinə yetirdiyi üçün keçirdiyi xoşbəxtlik, qürur hisslərini işğaldan azad edilmiş ərazilərimizdə bərpa-quruculuq işlərinin yüksək səviyyədə aparılmasında, soydaşlarımızın qısa müddətdə qayıdış ünvanlarının sayının artmasında təsdiqləyir. Müzəffər Ali Baş Komandan İlham Əliyev və birinci xanım Mehriban Əliyeva işğaldan azad edilmiş ərazilərimizə tez-tez səfərlər edirlər. Dövlətimizin başçısının şanlı Zəfərimizdən sonra da tarixi ədalətə və beynəlxalq hüquqa söykənən addımları və uğurlu nəticələr davamlılığı ilə diqqətdədir”.
Deputat qeyd edib ki, bu il sentyabrın 19-da lokal antiterror tədbirlərinin həyata keçirilməsi nəticəsində Azərbaycanın ərazi bütövlüyü və suverenliyi tam bərpa olundu: “Müzəffər Ali Baş Komandan İlham Əliyevin oktyabrın 15-də Xankəndidə, Xocalıda, Ağdərədə və Xocavənddə Azərbaycan Bayrağını ucaltması, Zəfərimizin üçüncü ildönümündə Xankəndi şəhərində keçirilən hərbi paradda iştirakı tariximizin qürur səhifələrini daha da zənginləşdirdi. Prezident İlham Əliyev 20 ildə verdiyi vədlərin, qarşıya qoyduğu bütün vəzifələrin uğurla yerinə yetirildiyini bildirdi. Bütün bunlar Heydər Əliyev siyasətinin Azərbaycana qazandırdığı uğurların təqdimatıdır”.
Malik Həsənov bu uğurlarımızın fonunda dövlətimizin başçısının müvafiq Sərəncamı ilə 2024-cü il fevralın 7-də keçiriləcək növbədənkənar prezident seçkilərindən də bəhs edib: “Növbədənkənar seçkilər ərazi bütövlüyümüzün və suverenliyimizin təsbitidir. Bu seçkiləri Zəfər seçkiləri də adlandırmaq olar. Müstəqillik tariximizdə ilk dəfə olaraq seçkilər bütün ölkə ərazisini əhatə edəcək. Ərazi bütövlüyümüzün və suverenliyimizin bərpası həm ölkəmizdə, həm də regionda yeni reallıqlar yaradıb. Bu reallıqlar yeni hədəflərin müəyyənləşdirilməsini bir zərurətə çevirib ki, bu da öz növbəsində növbədənkənar prezident seçkilərinin keçirilməsini şərtləndirir. Prezident İlham Əliyevin bu addımı özünəinamının və xalqın dəstəyinə əminliyinin təsdiqidir. Xalqımız bu seçkilərdə qalib Azərbaycanın möhtəşəm uğurlarının davamına səs verəcək. Heydər Əliyev siyasətinə dəstək Azərbaycanın uğurlu gələcəyinə dəstəkdir”.
Bölmənin digər xəbərləri
