UNICEF: Ən varlı ölkələrdə təqribən 8 milyon yeniyetmə funksional savadsızdır
Bakı, 15 may, AZƏRTAC
BMT-nin Uşaq Fondunun (UNICEF) çərşənbə günü dərc etdiyi yeni hesabata görə, dünyanın ən varlı ölkələrinin bir çoxunda uşaqlarda COVID-19 pandemiyası nəticəsində akademik performans, əqli rifah və fiziki sağlamlıq məsələlərində nəzərəçarpacaq dərəcədə azalma müşahidə edilib.
AZƏRTAC BMT-nin məlumatına istinadla xəbər verir ki, 2018-2022-ci illərin məlumatlarını müqayisə edən UNICEF əməkdaşları müəyyən ediblər ki, pandemiya mövcud tendensiyaları pisləşdirib: uşaqlar məktəbdə zəif nəticə göstərir, artıq çəki və ya piylənmə ehtimalı yüksəkdir, onlarda bədbinlik yaranıb.
UNICEF-in “İnnocenti” tədqiqat ofisinin direktoru Bo Viktur Nylund bildirib ki, bu məlumatlar uşaqların rifahı baxımından narahatedici meyarı müəyyən edir. Ofisin əməkdaşları bu mənfi halların daha çox üç ölkədə - Niderland, Danimarka və Fransada müşahidə olunduğunu qeyd ediblər.
Fond xəbərdarlıq edib ki, dünyanın ən varlı ölkələrinin bir çoxunda pandemiyadan sonra uşaqların akademik performansında, xüsusən də oxu və riyazi bacarıqlarında kəskin azalmalar müşahidə olunub. Məktəblərin bağlanması və məsafədən təhsil uşaqları təhsil proqramlarından təxminən 12 ay geri salıb.
Hesabatda vurğulanır ki, bu fəsadlar imkansız ailələrdən olan uşaqlar üçün daha ağır olub. Belə ki, 43 ölkədə təqribən 8 milyon 15 yaşlı uşaq funksional savadsız kimi qiymətləndirilib. Bu o deməkdir ki, sorğu edilən yaş qrupunun təxminən yarısı əsas mətni başa düşə bilmir. Bu fakt uzunmüddətli inkişafla bağlı həyəcan təbili çalır.
Psixi sağlamlıqla bağlı narahatlıqları da diqqətə çatdıran UNICEF qeyd edib ki, mövcud məlumatlara malik 32 ölkədən 14-də COVID pandemiyası zamanı uşaqların həyat məmnunluğu pisləşib, yeniyetmələr arasında intihar halları isə artıb.
Normadan artıq çəkisi olan 5-19 yaş arası uşaqların sayı da artıb, aşağı sosial-iqtisadi mənsubiyyətdən olanlar isə psixi və fiziki sağlamlıq baxımından daha pis nəticələrlə üzləşib.
Qeyd edilib ki, UNICEF varlı ölkələrdə uşaqların rifahı sahəsində çətin qazanılan nailiyyətlərin getdikcə daha həssas hala gəldiyi barədə xəbərdarlıq edir və hökumətləri daha ədalətli təhsil nəticələrini təmin etmək üçün əlverişsiz qruplara müdaxilələrə diqqət yetirməyə çağırır.
Bölmənin digər xəbərləri
