İQTİSADİYYAT
Ünvanlı sosial yardımların təyinatı və ödənişində şəffaflığın təmin olunması ilə bağlı brifinq keçirilmişdir
![Ünvanlı sosial yardımların təyinatı və ödənişində şəffaflığın təmin olunması ilə bağlı brifinq keçirilmişdir](/files/2013/3/1200x630/14071451131535352390_1200x630.jpg)
Bakı, 6 noyabr (AZƏRTAC). Noyabrın 6-da Əmək və Əhalinin Sosial Müdafiəsi Nazirliyi yanında Dövlət Sosial Təminat Xidmətinin rəisi Çingiz Əliyev ünvanlı dövlət sosial yardımlarının təyinatı və ödənişində şəffaflığın təmin olunması ilə bağlı KİV nümayəndələri üçün brifinq keçirmişdir.
Nazirliyin ictimaiyyətlə əlaqələr şöbəsindən AZƏRTAC-a bildirmişlər ki, Ç.Əliyev ünvanlı dövlət sosial yardımlarının təyinatı və ödənişinə nəzarətin həyata keçirilməsinin nazirliyin mühüm fəaliyyət sahələrindən biri olduğunu qeyd etmişdir. Bildirilmişdir ki, bu sahədə ötən müddətdə yol verilmiş nöqsanların, korrupsiyaya şərait yaradan halların aradan qaldırılması, şəffaflığın təmin olunması istiqamətində nazirliyin yeni rəhbərliyi tərəfindən müvafiq tədbirlərə başlanılmışdır. Aztəminatlı əhali qrupları bu tədbirlərin müsbət nəticələrini yaxın vaxtlarda hiss edə biləcəklər.
Bir neçə gün əvvəl rayon və şəhər əhalinin sosial müdafiəsi mərkəzlərinin (ƏSMM) direktorlarının iştirakı ilə nazirlikdə iclas keçirildiyini diqqətə çatdıran Ç.Əliyev ünvanlı sosial yardımların təyin olunmasında və ödənişində hər hansı neqativ hala yol verilməməsi və şəffaflığın təmin olunması ilə bağlı əmək və əhalinin sosial müdafiəsi naziri Səlim Müslümov tərəfindən mərkəz direktorlarına ciddi tapşırıqlar verildiyini bildirmişdir.
Ç.Əliyev qeyd etmişdir ki, bu tapşırıqların icrası diqqətdə saxlanılacaq və yardım üçün müraciət edən vətəndaşlarla münasibətlərdə korrupsiyaya yol verən əməkdaşlar barəsində ciddi tədbirlər görüləcəkdir. Eyni zamanda, hüquq mühafizə orqanları ilə müvafiq nəzarət metodlarının tətbiqinə dair müzakirələr aparılmışdır və yardımların təyinatında qanunsuzluğa əl atan əməkdaşların ifşa olunaraq cəzalandırılması üçün birgə tədbirlər görüləcəkdir.
Bu tədbirlərin daha effektli nəticələr verməsi üçün vətəndaşların da fəal olmalarının vacibliyini diqqətə çatdıran Ç.Əliyev ünvanlı yardım alan 134 mindən çox ailəyə KİV vasitəsilə müraciət edərək bildirmişdir ki, təyin olunmuş yardımların alınması üçün onlara banklar tərəfindən verilmiş plastik kartları heç bir halda mərkəz əməkdaşlarına verməsinlər. Heç bir əməkdaş vətəndaşları onlara təyin olunmuş yardımı onlarla bölüşməyə təhrik edə, yaxud onları yardım almaq hüququndan məhrum edə bilməz.
Eyni zamanda, vətəndaşlar əhalinin sosial müdafiəsi mərkəzlərində yardım təyinatı müqabilində hər hansı qanunsuz “sövdələşmələr”ə getməməli və belə hallarla üzləşdikləri təqdirdə nazirliyin 142 - Qaynar xəttinə, yaxud (012) 595 53 81, (012) 595 04 28 və (012) 595 04 26 nömrəli telefonlara müraciət etməlidirlər.
Ünvanlı yardımların təyinatı sahəsində şəffaflığın təmin olunması istiqamətində daha bir yenilik olaraq, əmək haqları və pensiyalar, sosial müavinətlər kimi, növbəti ilin yanvar ayından etibarən ünvanlı yardımlar da aylıq hesablara köçürüləcəkdir.
Brifinqdə Çingiz Əliyev KİV nümayəndələrinin suallarını da cavablandırmışdır.