USAİD QAXDA DAHA BİR İCMA LAYİHƏSİ HƏYATAKEÇİRMİŞDİR
CHF təşkilatının ölkə üzrə direktoru Nil MikKalla mərasimdə çıxış edərək, proqram çərçivəsində Qax rayonunda həyata keçirilən layihələr barədə məlumat vermişdir. Bildirilmişdir ki, Ləkit icması tərəfindən hazırlanan “İçməli su xəttinin genişləndirilməsi" layihəsi təşkilatın Qax rayonunda başa çatdırdığı ikinci layihədir. Layihənin dəyəri 13 min 326 manatdır. Layihəyə Ləkit kənd icması 6,4 min manat, xeyriyyəçi kənd sakini 700 manat, USAİD isə 6,2 min manat vəsait ayırmışdır. 3 kilometr məsafədən gətirilən yeni su xətti kənd əhalisinin içməli suya olan tələbatının yaxşılaşdırılmasına böyük təsir göstərəcəkdir. Nil MikKalla vurğulamışdır ki, Ləkit icması nümunəvi icmalardan biri olduğu üçün hazırda təşkilat bu kənddə daha bir layihənin - kənd stadionunun təmiri layihəsinin həyata keçirilməsinə də başlamışdır. Yeni layihənin dəyəri 5 min ABŞ dollarıdır.
Qax Rayon İcra Hakimiyyəti başçısının müavini Ziyafət Xasıyeva kənd əhalisinin fəallığının və təşəbbüskarlığının artırılmasında belə layihələrin böyük əhəmiyyətini vurğulamışdır. O demişdir ki, belə layihələr icmalarla yerli icra və bələdiyyə qurumları, habelə ayrı-ayrı icmalar arasında əlaqələrin, əməkdaşlığın daha da genişləndirilməsinə, sakinlərin yerli icmalara inamının daha da artmasına müsbət təsir göstərir.
Kəndin icra və bələdiyyə qurumlarının nümayəndələri sakinlərin sosial-iqtisadi vəziyyətinin yaxşılaşmasına yönələn bu layihənin reallaşmasına göstərdiyi köməyə görə USAİD və CHF təşkilatlarına minnətdarlıqlarını bildirmişlər.
