VAŞİNQTON ŞTATINDA SİQARET ƏLEYHİNƏ ƏN SƏRT QANUNLARDAN BİRİ QÜVVƏYƏ MİNMİŞDİR

09.12.2005 [16:02]
Çap et
A⁺ A^-

AZƏRTAC xarici informasiya agentliklərinə istinadla xəbər verir ki, Vaşinqton ştatında ABŞ-ın siqaret çəkənlərə qarşı yönəlmiş ən sərt qanunlarından biri qüvvəyə minmişdir. Bir ay əvvəl referendumda qəbul olunmuş bu qanun təkcə ictimai yerlərdə, o cümlədən restoranlarda, barlarda və kazinolarda deyil, həm də onların yaxınlığında siqaret çəkməyi qadağan edir. İndi siqareti belə obyektlərdən azı 8 metr aralıda çəkmək olar.

Qanun pozucularını 100 dollar məbləğində cərimə gözləyir. Ərazisində belə qanun pozuntusuna yol verilmiş bar və ya restoran sahibi spirtli içki satışına lisenziyadan məhrum oluna bilər. Bir çox bar və restoran sahibləri ehtiyat edirlər ki, onların müştəriləri hindi tayfalarına məxsus kazinolara getməyə başlayacaqlar. Çünki bu qanun həmin obyektlərə aid deyildir.

Vaşinqton ABŞ-ın siqaretçəkənlər üçün sərt məhdudiyyətlər qoyulmuş 9-cu ştatıdır. Hazırda belə qanunlar Kaliforniya, Konnektikut, Delaver, Massaçusets, Men, Nyu-York, Rod-Aylənd və Vermont ştatlarında da qüvvədədir. Bu ştatlarda iş otaqlarında, o cümlədən restoranlarda və barlarda siqaret çəkmək qadağan edilmişdir. Digər 7 ştatda bu zərərli vərdişə restoranlarda qadağa qoyulsa da, barlarda siqaret çəkməyə icazə verilir. Lakin 8 metrlik “bufer zonası” hələlik təkcə Vaşinqtonda tətbiq olunur.

VAŞİNQTON ŞTATINDA SİQARET ƏLEYHİNƏ ƏN SƏRT QANUNLARDAN BİRİ QÜVVƏYƏ MİNMİŞDİR

MÜƏLLİFLƏ ƏLAQƏ

Bölmənin digər xəbərləri