Vaşinqtonda Xocalı soyqırımına həsr edilmiş sərgi təşkil olunub VİDEO
Vaşinqton, 25 fevral, AZƏRTAC
ABŞ-nin paytaxtı Vaşinqtonda Xocalı soyqırımının 34-cü illiyinə həsr olunmuş “Qaranlıqdan işığa” adlı sərgi və rekviem konserti təşkil olunub.
AZƏRTAC-ın məlumatına görə, Azərbaycanın ABŞ-dəki səfirliyinin təşkilatçılığı ilə baş tutmuş tədbirdə Türkiyə, Özbəkistan və bir sıra ölkələrin ABŞ-dəki səfirləri və digər diplomatik korpus nümayəndələri, yerli ictimaiyyət və Azərbaycanın ABŞ-dəki diaspor təmsilçiləri iştirak edib.
Tədbirdə Azərbaycanın tanınmış rəssamı Nazim Məmmədovun Xocalı soyqırımına həsr olunmuş kolleksiyası nümayiş olunub. Tədbirin əvvəlində Xocalı soyqırımı zamanı həlak olmuş insanların və Azərbaycanın müstəqilliyi və ərazi bütövlüyü uğrunda canlarından keçmiş şəhidlərin ruhu sükutla yad edilib.
Sonra çıxış edən Azərbaycanın ABŞ-də səfiri Xəzər İbrahim azərbaycanlıların başına gətirilən bu faciədən danışıb və bu qaranlıq günlərin xalqı daha da gücləndirdiyini deyib. O bildirib ki, dünyanın hər yerində yaşayan azərbaycanlılar bu günahsız ruhların təkcə xatirələrdə deyil, həm də əməllərdə yaşamasına məsuliyyət daşıyır.
Daha sonra çıxış edən “Arts Council Azerbaijan”ın direktoru Dadaş Məmmədov tədbir çərçivəsində açılmış “Xocalı harayı” adlı sərgi barədə danışaraq atası, tanınmış rəssam Nazim Məmmədovun Xocalı soyqırımına həsr etdiyi bu əsərləri həyatının 10 ili ərzində yaratdığını deyib. O, 2002-ci ildə Xocalı faciəsinin 10-cu ildönümü münasibətilə 40-a yaxın əsərlərdən ibarət sərginin Milli İncəsənət Muzeyində açıldığını xatırladaraq sərgidə Nazim Məmmədovun bununla da özünün həyat missiyasını yerinə yetirdiyini əlavə edib. O, bu sərginin bütün dünyada təşkil edildiyini bildirib və kolleksiya haqqında hekayələri danışaraq incəsənət vasitəsilə bunu nümayiş etdirməkdən məmnun olduğunu vurğulayıb.
Tədbirdə azərbaycanlı bəstəkar və pianoçu Turan Manafzadənin ifasında Abuzər Manafzadənin “Xocalıya”, Turan Manafzadənin “Mənim Azərbaycanım”, Üzeyir Hacıbəylinin “Çırpınırdı Qara dəniz”, Elza İbrahimovanın “Sən yadıma düşəndə”, “Laçın”, “Sarı gəlin” xalq mahnıları, “Nazəndə sevgilim” mahnısı, Aşıq Veysəlin “Uzun, ince bir yoldayım”, bəstəkarlar Fredrix Şopenin və Con Keycin əsərləri səsləndirilib.
Vaşinqton
Bölmənin digər xəbərləri
