Vətən müharibəsində şücaət göstərən xaçmazlılara orden və medallar təqdim olunub
Xaçmaz, 26 iyun, Elxan Yusifli, AZƏRTAC
Xaçmazda Vətən müharibəsi zamanı şücaətlərinə görə, Azərbaycan Respublikasının Prezidenti, Silahlı Qüvvələrin Ali Baş Komandanı İlham Əliyev tərəfindən təltif edilən müharibə iştirakçıları və şəhidlərin ailə üzvlərinə orden və medallar təqdim olunub.
AZƏRTAC-ın bölgə müxbiri xəbər verir ki, 26 iyun - Silahlı Qüvvələr Günü münasibətilə təşkil olunan mərasimin iştirakçıları əvvəlcə ümummilli lider Heydər Əliyevin abidəsini ziyarət edib, ruhuna ehtiram nümayiş etdiriblər.
Xaçmaz Rayon İcra Hakimiyyəti başçısının müavini Bəxtiyar Osmanov 44 günlük Vətən müharibəsində əldə olunan tarixi Qələbədən söz açıb. Bildirilib ki, xaçmazlı gənclər də torpaqlarımızın işğaldan azad olunmasında fəallığı ilə seçilib. Döyüşlərdə qəhrəmanlıq göstərən Vətən oğullarının hər biri Müzəffər Ali Baş Komandan İlham Əliyev tərəfindən mükafatlandırılıb.
Səfərbərlik və Hərbi Xidmətə Çağırış Üzrə Dövlət Xidmətinin Xaçmaz rayon şöbəsinin rəisi Mətləb Murğuzov tədbir iştirakçılarını əlamətdar gün münasibəti ilə təbrik edərək, gələcək həyatlarında uğurlar arzulayıb.
Şəhid ailələri və Qarabağ qaziləri göstərilən diqqət qayğıya görə Azərbaycan Respublikasının Prezidenti İlham Əliyev və Birinci vitse-prezident Mehriban Əliyevaya minnətdarlıqlarını ifadə ediblər.
Mərasimin sonunda Vətən müharibəsi iştirakçıları və şəhid döyüşçülərin ailə üzvlərinə orden və medallar təqdim olunub.
Bölmənin digər xəbərləri
