Bakı, 2 dekabr, AZƏRTAC

Azərbaycanda aparılan sosial islahatlar bir daha göstərir ki, vətəndaşın sosial rifahı ən ön plandadır. Vətəndaşların sosial rifahının yaxşılaşdırılması Azərbaycanda dövlət siyasətinin əsas prioritet istiqamətlərindən biridir. Bu siyasət sosial ədalət, iqtisadi bərabərlik, sosial xidmətlərin yaxşılaşdırılması kimi məqsədləri özündə ehtiva edir. Bütün bu məqsədlərin, ümumilikdə isə bu siyasətin mərkəzində insan amili dayanır. Bu da nəticədə ölkə vətəndaşlarının həyat şəraitinin yaxşılaşdırılmasına əhəmiyyətli təsir göstərir.

Bu fikirləri AZƏRTAC-a açıqlamasında “Vətəndaşların Sosial Rifahı Naminə” İctimai Birliyinin sədri İradə Rzazadə bildirib.

Onun sözlərinə görə, növbəti il üçün müəyyənləşdirilən dövlət büdcəsinin əsas xərc istiqamətlərindən biri əhalinin sosial müdafiəsi və sosial rifahının yüksəldilməsidir. Bu ilə nisbətən gələn il bu istiqamətdə daha çox vəsait ayrılacaq. Minimum əməkhaqqının, minimum pensiyanın, sosial müavinətlərin, təqaüdlərin məbləğinin artırılması nəzərdə tutulur. 2025-ci ildə pensiyaların indeksləşdirilməsi planlaşdırılır. Bu, 3 milyon insanı əhatə edəcək. Ünvanlı sosial yardım proqramına 457 milyon manat ayrılacaq. Əhalinin məşğulluğuna, yoxsulluğun azaldılmasına, sosial müdafiə tədbirlərinə də 2,6 milyard manat vəsait ayrılıb. Bütün bunlar məhz vətəndaşların sosial rifahının yüksəlməsinə xidmət edəcək.

QHT sədri bildirib ki, vətəndaş cəmiyyətinin nümayəndələri hər bir sahədə olduğu kimi, sosial siyasətin həyata keçirilməsinə də ictimai nəzarəti həyata keçirir. “Vətəndaşların sosial rifahının yüksəldilməsi məqsədilə həyata keçirilən siyasətin icrasında üzərimizə düşən öhdəlikləri yerinə yetirməyə çalışırıq. Ümumilikdə sosialyönümlü xərclər 8 faiz artırılaraq 16,9 milyard manata çatıb və ümumi dövlət büdcəsi xərclərinin 41 faizini təşkil edir. Gələn il reallaşdırılması nəzərdə tutulan sosial paketin ümumilikdə 3 milyon insanı əhatə etməsi dövlətin siyasətinin mərkəzində insan amilinin ön sırada dayandığını bir daha göstərir”, - deyə o qeyd edib.