“Vətənpərvər Azərbaycan gəncliyi” devizi altında vebinar təşkil olunub
Bakı, 16 mart, AZƏRTAC
Səfərbərlik və Hərbi Xidmətə Çağırış üzrə Dövlət Xidməti (SHXÇDX) fəaliyyət istiqamətlərinə uyğun olaraq gənclər arasında vətənpərvərlik hisslərinin təbliğ olunması, təhsil müəssisələrində vətəndaşlara çağırışaqədərki hazırlıq fənni üzrə dərslərin keyfiyyətli tədrisinə yaxından kömək göstərilməsi və çağırışaqədər yaş həddində olan vətəndaşların Silahlı Qüvvələrdə müddətli həqiqi hərbi xidmətə hazırlanması məqsədilə xüsusi ixtisaslar üzrə mütəxəssis hazırlığının daha səmərəli təşkili üçün silsilə tədbirlərin keçirilməsini planlaşdırıb.
SHXÇDX-dən AZƏRTAC-a bildiriblər ki, plana uyğun olaraq Dövlət Xidməti tərəfindən Təhsil Nazirliyinin Bakı Şəhəri üzrə Təhsil İdarəsi və Azərbaycan Respublikası Gənclər Fondu ilə birlikdə Binəqədi rayonunda fəaliyyət göstərən orta məktəblərin çağırışaqədərki hazırlıq rəhbərləri ilə “Vətənpərvər Azərbaycan gəncliyi” devizi altında “Zabit olmaq, hərbi vəzifə daşımaq gənclərimizin ən müqəddəs vəzifələrindəndir” mövzusunda vebinar təşkil olunub.
Xidmətin idarə rəisi mayor Füzuli İsmayılov tədbirin məqsədi barədə ətraflı məlumat verib. Bildirib ki, cəmiyyətdə dövlətçilik üçün gərəkli olan bütün proseslərin aparıcı qüvvəsi gənclərdir. Çağdaş Azərbaycan gəncləri cəmiyyətin bütün sahələrində nəinki fəallığı ilə fərqlənir, həm də dövlət və dövlətçilik üçün mühüm təşəbbüslərin gerçəkləşməsində israrlıdırlar.
Vebinarda gənclərin yüksək vətənpərvərlik ruhunda tərbiyəsində Səfərbərlik və Hərbi Xidmətə Çağırış üzrə Dövlət Xidmətinin funksional vəzifə istiqamətlərinə uyğun olaraq həyata keçirdiyi ardıcıl fəaliyyətin nəticələri qeyd edilib. Çıxışda Vətən müharibəsindəki Qələbədən sonra Prezident, Müzəffər Ali Baş Komandan İlham Əliyevin rəhbərliyi ilə qarşıda bizi gözləyən Böyük Qayıdış prosesi, sülhün əbədiliyi üçün Silahlı Qüvvələrin daimi təkmilləşdirilməsi baxımından müasir dövrün çağırışlarına uyğun olaraq çağırışaqədərki hazırlıq işlərinə xüsusi diqqət yetirilməsinin zəruriliyi əsaslandırılıb.
Gənclər Fondunun icraçı direktorunun müavini Orxan Ərəbov təmsil etdiyi qurumun fəaliyyəti, həyata keçirdiyi layihələr haqqında ətraflı məlumat verib. Fondun tərəfdaş kimi Səfərbərlik və Hərbi Xidmətə Çağırış üzrə Dövlət Xidməti ilə birlikdə bir sıra layihələr reallaşdırdığını diqqətə çatdırıb. “Vətənpərvər Azərbaycan gəncliyi” devizi ilə təşkil olunmuş vebinarın əhəmiyyətini vurğulayıb.
Bakı Şəhəri üzrə Təhsil İdarəsi nəzdində Təlimə Dəstək Mərkəzinin gənclərin çağırışaqədərki hazırlığı üzrə metodisti Mürsəl Qurbanov orta təhsil müəssisələrində bu sahədə görülən işlərdən bəhs edib. Çağırışaqədərki hazırlıq işinə verilən önəmi, görülən işləri konkret faktlarla diqqətə çatdırıb. Qarşıdakı dövr üçün bu sahədə Səfərbərlik və Hərbi Xidmətə Çağırış üzrə Dövlət Xidməti ilə birlikdə daha fəal iş aparılacağını bildirib.
Vebinarda Binəqədi rayonunun 157, 244 və 3 saylı məktəblərinin çağırışaqədərki hazırlıq rəhbərləri Orxan Rəfiyev, Saleh Mirzəyev və Elgiz Səlimov çıxış edərək təcrübələrini bölüşüblər.
Diskussiya şəraitində keçən tədbirin sonunda suallar cavablandırılıb.
Bölmənin digər xəbərləri
