Vilnüsdə “Sonu olmayan dəhliz” filminin təqdimatı keçirilmişdir
Vilnüs, 24 fevral (AZƏRTAC). Vilnüsün ən böyük kinoteatrı “Forume Cinema Vingis” mərkəzində “Sonu olmayan dəhliz” filminin təqdimatı keçirilmişdir.
“Sonu olmayan dəhliz” sənədli filmi Heydər Əliyev Fondunun və “Xocalıya ədalət” beynəlxalq kampaniyasının təşəbbüsçüsü Leyla xanım Əliyevanın dəstəyi ilə Avropa kinematoqrafçıları tərəfindən çəkilmişdir.
Azərbaycanın Litvadakı səfirliyinin təşkilatçılığı ilə baş tutan təqdimatda Litvanın dövlət və siyasət xadimləri, millət vəkilləri, məşhur prodüser mərkəzlərinin rəhbərləri, mədəniyyət və incəsənət xadimləri, gənclər təşkilatlarının liderləri, jurnalistlər iştirak etmişlər. 400 nəfərdən çox iştirakçının olduğu tədbirdə filmin prodüseri Andrius Brokas, rejisoru Mindauqas Urbanaviçius “Sonu olmayan dəhliz” filmini Avropanın bir çox ölkələrindən olan kinematoqrafçıların birlikdə səyi ilə dörd il ərzində ərsəyə gətirdiklərini qeyd etmişlər.
Təqdimat mərasiminə xüsusi dəvət olunmuş filmin iştirakçıları olan Litva, İngiltərə, Rusiya, Ermənistan və Azərbaycan jurnalist və hüquq müdafiəçiləri filmin nümayişindən öncə çıxış etmişlər.
Qarabağda erməni vəhşiliklərini öz gözləri ilə görən Litvalı hərbi jurnalist Riçardas Lapaitis təəssüratlarını bölüşmüşdür.
Sonra “Sonu olmayan dəhliz” filmi nümayiş olunmuşdur.
Filmdən sonra kinomərkəzin foyesində iştirakçılar təəssüratlarını bölüşmüşlər.
Litvanın sabiq xarici işlər naziri millət vəkili Audronius Ajubalis, Litva Seymində Azərbaycanla dostluq qrupun rəhbəri deputat Yuras Pojela, Litvanın Xarici və Daxili işlər, Müdafiə nazirliklərinin nümayəndələri, eləcə də digər qonaqlar səfir Həsən Məmmədzadə ilə söhbətlərində insanlığa sığmayan bu vəhşiliklərdən dərindən təsirləndiklərini bildirmişlər.
Səfir Həsən Məmmədzadə Xocalı faciəsinə yaxın gələcəkdə ədalətli qiymət veriləcəyinə, qətliamı törədənlərin layiqli cəzalarını çəkəcəklərinə inandığını qeyd etmiş, Litvanın da bir çox ölkələr kimi Xocalı soyqırımını tanıyacağına ümid etdiyini bildirmişdir.
Tədbir barədə Litvanın nüfuzlu KİV-də, delfi.lt, 15min.lt, alfa.lt, penki.lt informasiya agentliklərində yazı və məqalələr dərc olunmuşdur. Penki TV televiziyası “Endless corrisdor - Dağlıq Qarabağ dramı” adlı xüsusi veriliş hazırlamış, səfir Həsən Məmmədzadənin müsahibəsi yaymışdır.
“Sonu olmayan dəhliz” filmi mart ayında keçiriləcək 18-ci Vilnüs beynəlxalq kino festivalında “Bahar kinosu” çərçivəsində iki dəfə nümayiş olunacaqdır.
Ayrıca, səfirliyin dəstəyi ilə Litva kütləvi informasiya vasitələrində Xocalı faciəsi ilə bağlı yazı və məqalələr dərc olunacaq, fevralın 25-də yerli diaspor qurumu Ermənistanın Litvadakı səfirliyi qarşısında piket aksiyası keçiriləcəkdir. Aksiyaya Vilnüs şəhər meriyasından icazə alınmışdır. Litvanın digər şəhərlərində Kaunas və Klaipedada Xocalı soyqırımı ilə bağlı tədbirlərin keçirilməsi nəzərdə tutulmuşdur.
Nigar Hüseynova
AZƏRTACın xüsusi müxbiri
Vilnüs
Bölmənin digər xəbərləri
