Vladanka Andreeva: Rəqəmsal innovasiyalar inklüziv inkişafın mühüm hərəkətverici qüvvəsidir
Bakı, 24 oktyabr, AZƏRTAC
Son onillikdə Azərbaycan hökuməti məşğulluq xidmətlərinin müasirləşdirilməsi, sosial müdafiə sisteminin gücləndirilməsi və insan ləyaqətinin dövlət xidmətlərinin mərkəzinə yerləşdirilməsi istiqamətində mühüm nailiyyətlər qazanıb. Rəqəmsal innovasiya həm güclü transformasiya vasitəsidir, həm də sosial daxilolmanın təməl hərəkətverici qüvvəsidir. Son illərdə Azərbaycan bu sahədə region üçün nümunəvi bir model formalaşdırıb.
AZƏRTAC xəbər verir ki, bu fikirləri DOST Agentliyinin təşkilatçılığı ilə “SOCGOV 2025: Süni intellekt - insan və transformasiya üçün” mövzusunda keçirilən beynəlxalq konfransda Birləşmiş Millətlər Təşkilatının Azərbaycandakı rezident əlaqələndiricisi Vladanka Andreeva çıxışı zamanı səsləndirib.
O, rəqəmsal innovasiyaların sosial inkişaf, inklüzivlik və davamlı rifahın təminində oynadığı rolu vurğulayıb. Həmçinin 2018-ci ildə yaradılan DOST Agentliyinin fəaliyyətini xüsusi qeyd edib: “160-dan çox xidmətin bir mərkəzdə birləşdirilməsi sayəsində DOST mərkəzləri vətəndaşlara daha sürətli, şəffaf və ləyaqətli xidmətlər təqdim edir. Bu, sosial idarəetmədə həqiqətən inqilabi addımdır”.
Vladanka Andreeva bildirib ki, BMT bu təcrübəni yüksək qiymətləndirir və artıq regiondakı bir sıra ölkələr Azərbaycan modelindən öz milli şəraitlərinə uyğun şəkildə faydalanmağa başlayıblar: “Bu təşəbbüslər təkcə milli miqyasda deyil, həm də qlobal səviyyədə mühüm töhfədir. Onlar BMT-nin Davamlı İnkişaf Məqsədlərinin (SDG) həyata keçirilməsinə, xüsusilə SDG 1 (Yoxsulluğa son), SDG 8 (Layiqli əmək və iqtisadi artım) və SDG 10 (Bərabərsizliklərin azaldılması) hədəflərinə birbaşa xidmət edir. BMT və Azərbaycan hökuməti arasında əməkdaşlıq sosial xidmətlərin rəqəmsallaşdırılması, inklüziv məşğulluq siyasətlərinin təşviqi və həssas qrupların müdafiəsi sahəsində davamlı nəticələr əldə etməyə yönəlib. Bizim tərəfdaşlığımız ortaq bir dəyərlə, hər bir fərdin, mənşəyindən, qabiliyyətindən və şəraitindən asılı olmayaraq, cəmiyyətin inkişafına töhfə verə bilməsi prinsipinə əsaslanır”.
BMT-nin nümayəndəsi süni intellektin tətbiqi ilə bağlı qlobal müzakirələrin vacibliyinə də toxunub: “Bu konfransın mövzusu düzgün seçilib. Artıq mübahisə “süni intellektdən istifadə etməliyikmi?” sualı deyil, “ondan necə istifadə etməliyik?” sualı üzərindədir”.
Vladanka Andreeva xatırladıb ki, BMT-nin Baş katibi Antonio Quterres qurumun Baş Assambleyasının 80-ci sessiyasında “Qlobal süni intellekt idarəçiliyi dialoqu”nun başladıldığını və müstəqil beynəlxalq elmi panelin yaradıldığını elan edib. Bu təşəbbüs süni intellektin BMT Nizamnaməsinin dəyərləri ilə uyğun şəkildə inkişaf etdirilməsini təmin etməyə yönəlib. “Düşünürəm ki, Azərbaycan üçün bu müzakirələr çox aktualdır. Süni intellekt ehtiyacları qabaqcadan görə, xidmətləri fərdiləşdirə və bəzən ən çətin şəraitdə olan insanlara belə, əl uzada bilər. Eyni zamanda, bu texnologiyalar ön cəbhədə çalışan sosial işçilərə daha çox empatiya göstərmək, dinləmək və qayğı göstərmək üçün qazandırır”, – deyə o, çıxışını tamamlayıb.
Bölmənin digər xəbərləri
