Vüqar İskəndərov: Azərbaycan qəbiristanlığını dağıtmaqla o torpaqların əsl sahiblərini unutdurmaq mümkün deyil
Bakı, 17 oktyabr, AZƏRTAC
Xankəndi yaxınlığında azərbaycanlılara aid məzarların ermənilər tərəfindən dağıdılması ilə bağlı məlumatlar yayılıb. Bu, həqiqətən çox təəssüfedici və qınanılacaq bir məsələdir. Çünki insanlığa sığmayan bu hərəkətlərlə onlar nəinki bizə, dünyaya da özlərini sübut etdirirlər ki, bu vandallar həqiqətən insanlıq adına ləkədirlər.
Bunu AZƏRTAC-a açıqlamasında Milli Məclisin deputatı Vüqar İskəndərov deyib.
“Çox təəssüfləndirici haldır ki, onlar bu işlərin tarixi faktları təhrif etməklə olmadığını hələ də anlaya bilmirlər. Azərbaycan qəbiristanlığını dağıtmaqla, bizə aid olan maddi-mənəvi dəyərləri məhv etməklə o torpaqların əsl sahiblərini unutdurmaq mümkün deyil. Qarabağ Azərbaycana aiddir və biz 44 günlük Vətən müharibəsində canımız, qanımız bahasına bunu sübut etdik. Amma Ermənistanda bəzi vandal düşüncəli insanlar elə bilir ki, bu cür barbarlığa yol verməklə nəyəsə nail olacaqlar. Sadəcə olaraq bir təəssüfləndirici məqam var ki, biz beynəlxalq qurumlara dəfələrlə, faktlarla göstərsək də, sübut etsək də onlara qarşı əməli addımlar atılmır. Əslində onların dağıntılara məruz qoyduğu, təhqir etdiyi Azərbaycan qəbiristanlığı bizim tarixi mədəni abidəmizdir”, - deyə deputat bildirib.
O qeyd edib ki, bu addımlardan nəticə çıxararaq UNESCO kimi qurumlar hərəkətə keçməli və bizim digər tarixi abidələrimizlə bağlı araşdırma aparmaqla vandalizmin qarşısını almalıdır. Amma UNESCO kimi mötəbər təşkilatın bu məsələlərə biganə münasibəti onlara imkan verir ki, Azərbaycan xalqının yüzilliklər boyu yaratdığı mədəni-tarixi irsi dağıtsınlar. UNESCO 1954-cü ilin Haaqa Konvensiyasının şərtlərinin kobudcasına pozulmasına göz yumduqca, dağılan abidələrin, məzarlıqların, məscidlərin sayı artır. Bu cür hadisələrin meydana gəlməsi UNESCO ilə birgə araşdırma missiyasının yaradılmasını labüd edir. Çünki beynəlxalq qurumların soyuq münasibəti tarixi abidələrimizin gələcək taleyini də şübhə altında qoyur. Odur ki, başda UNESCO olmaqla digər mədəniyyət sahələrində fəaliyyət göstərən beynəlxalq təşkilatlar vaxtında bu işə bir əncam çəkməlidirlər.
“Çox maraqlıdır ki, beynəlxalq qurumların məsələlərə ikili standartlarla yanaşmaları özlərinin qoyduğu qayda-qanunları pozmalarına vadar edir. Əgər Haaqa Konvensiyasının şərtləri pozulursa, niyə buna qarşı hansısa tədbir görülmür? Bütün sənədlərlə və sübutlarla biz erməni barbarlığını illərdir təqdim edirik. Görünür, biz yenə də hər məsələdə olduğu kimi bu işləri də düşünülmüş siyasət və öz gücümüzlə həll etməli olacağıq”, - deyə Vüqar İskəndərov diqqətə çatdırıb.
Bölmənin digər xəbərləri
