Vyetnamın dövlət başçısı Azərbaycanın dövlət şirkətlərinin rəhbər şəxsləri ilə görüşüb
Bakı, 8 may, AZƏRTAC
Mayın 8-də Vyetnam Sosialist Respublikası Kommunist Partiyasının Mərkəzi Komitəsinin Baş katibi To Lam Azərbaycana səfəri çərçivəsində dövləti təmsil edən şirkət və fond rəhbərləri ilə görüş keçirib.
AZƏRTAC xəbər verir ki, görüşdə “AzerGold” QSC-nin İdarə Heyətinin sədri Zakir İbrahimov, Azərbaycan Respublikası Dövlət Neft Şirkəti və Azərbaycan Respublikası Dövlət Neft Fondunun rəhbər şəxsləri, Vyetnamın Sənaye və Ticarət Nazirliyinin təmsilçiləri iştirak ediblər.
Baş katib To Lam ölkəsindəki investisiya mühiti, vergi sistemi, faydalı qazıntıları haqqında geniş məlumat verib. Qeyd olunub ki, sonuncu dəfə Vyetnamın dövlət başçısı 1969-cu ildə Azərbaycanda səfərdə olub.
“Vyetnamın neft və qaz sənayesində çalışan bir çox mütəxəssislər Bakıda ali təhsil alıblar. Azərbaycan ilə əlaqələrin uzaq tarixi olsa da bu gün qarşılıqlı iqtisadi əlaqələrin daha da genişlənməsi zərurəti yaranıb. Azərbaycanın böyük iqtisadi potensialı var və buna görə də Vyetnam Azərbaycan ilə əməkdaşlığı özünün strateji-siyasi xətti hesab edir. Biz neft və qaz sahəsində əməkdaşlıq edirik. Azərbaycanın SOCAR şirkəti ilə Vyetnam Milli Sənaye – Enerji Qrupu (“PetroVietnam”) arasında Anlaşma Memorandumu imzalanıb. Bu sənəd ölkələrimiz arasında enerji sahəsində qarşılıqlı faydalı əməkdaşlıq əlaqələrinin inkişafına böyük təkan verəcək”, - deyə To Lam vurğulayıb.
Baş katib nəzərə çatdırıb ki, Azərbaycan ilə alternativ enerji istehsalı sahəsində də əməkdaşlıq etmək niyyəti var: “Vyetnamın coğrafi vəziyyəti - günəş, külək enerji istehsalına imkan verir. Buna görə də Azərbaycanın şirkətləri ekoloji cəhətdən təmiz enerji istehsalı üçün Vyetnama sərmayə yatıra bilərlər. Hazırda Vyetnamın müvafiq dövlət strukturları Azərbaycana sərmayə yatırmaq məsələsini nəzərdən keçirirlər. Qarşılıqlı investisiya yatırımı ölkələrimizin iqtisadi və siyasi əməkdaşlığını gücləndirər”.
To Lam Azərbaycanın Dövlət Neft Fondunun fəaliyyətini təqdir edərək, bu təcrübədən istifadə edəcəklərini də qeyd edib. Nəzərə çatdırılıb ki, Vyetnamda faydalı qazıntılar ilə məşğul olan dövlət şirkətləri ilə yanaşı özəl şirkətlər də var və bu sahəyə sərmayə yatırılmasını istəyən şirkətlər əməkdaşlığa hazırdırlar.
Vyetnamın dövlət başçısı onu da bildirib ki, hazırda ölkəsində geniş islahatlar həyata keçirilir və bu islahatların nəticəsində investisiya mühiti daha da səmərəli olacaq.
Görüşdə çıxış edən “AzerGold” QSC-nin İdarə Heyətinin sədri Zakir İbrahimov ölkələrimiz arasında qarşılıqlı hörmət, yüksək etimad və möhkəm dostluq əsasında qurulan münasibətlərin siyasi, iqtisadi, ticarət, elmi, texniki və digər sahələrdə yüksələn xətlə inkişaf etdiyi bildirib. Qeyd olunub ki, sağlam təməllər üzərində formalaşan və inkişaf edən əlaqələr bu gün Azərbaycan Prezidenti İlham Əliyev və Vyetnam Kommunist Partiyası Mərkəzi Komitəsinin Baş katibi To Lamın siyasi iradəsi ilə daha da möhkəmlənməkdə, inkişaf etməkdədir.
Zakir İbrahimov dağ-mədən sahəsində ixtisaslaşmış dövlət şirkəti olan “AzerGold” QSC-nin fəaliyyəti haqqında da məlumat verərək, QSC-nin qəbul etdiyi inkişaf strategiyasına uyğun olaraq Azərbaycanda uğurlu mədənçilik fəaliyyəti həyata keçirməklə yanaşı, ölkə hüdudlarından kənarda da əməkdaşlıq əlaqələri quraraq, fəaliyyətlərini genişləndirməkdə maraqlı olduqlarını diqqətə çatdırıb. Bu məqsədlə 2022-ci ildən xarici ölkələrdə fəaliyyət istiqamətində aktiv işlərə başlanıldığı qeyd olunub. Bu mənada “AzerGold” QSC-nin zəngin mineral ehtiyatlara malik olan Vyetnam Sosialist Respublikasının müvafiq dövlət qurumları və şirkətləri ilə dağ-mədən və geologiya sahəsində birgə əməkdaşlıq əlaqələrinin yaradılmasının mümkünlüyü qeyd olunub. Eyni zamanda texnologiya transferi, mütəxəssis hazırlığı və davamlı inkişaf prinsiplərinə əsaslanan layihələrin icrasında yeni əməkdaşlıq imkanlarının qurula biləcəyi diqqətə çatdırılıb.
Görüş qarşılıqlı müzakirə formatında davam edib.
Bölmənin digər xəbərləri
