WUF13-ün gündəliyi İqtisadiyyat İnstitutunun gənc tədqiqatçıları üçün elmi müzakirə mövzusuna çevrilib
Bakı, 22 may, AZƏRTAC
“Ağıllı” şəhər, “ağıllı” kənd, yaşıl iqtisadiyyat, yaşıl şəhər, dayanıqlı urbanizasiya və şəhərsalmanın iqtisadi təsirləri Elm və Təhsil Nazirliyi İqtisadiyyat İnstitutunun elmi gündəliyində diqqətdə saxlanılan mövzulardandır. Bu məsələlər postkonflikt ərazilərinin bərpası, regional inkişaf, məşğulluq, demoqrafik proseslər, infrastrukturun iqtisadi səmərəliliyi və yaşıl inkişaf istiqamətlərində aparılan tədqiqatlarda nəzərə alınır. İnstitutun Postkonflikt ərazilərinin bərpası elmi mərkəzi tərəfindən hazırlanmış “Azərbaycanın postkonflikt ərazilərində yeni iqtisadiyyat quruculuğu: elmi əsaslar, çağırışlar və tətbiqi həllər” adlı monoqrafiyada da “Ağıllı şəhər” və “Ağıllı kənd” konsepsiyalarına, bu yanaşmaların işğaldan azad edilmiş ərazilərdə tətbiqi imkanlarına, yeni iqtisadi modelin formalaşmasında müasir texnologiyaların və dayanıqlı inkişaf prinsiplərinin roluna xüsusi yer ayrılmışdır.
Bu fikirləri AZƏRTAC-a müsahibəsində Elm və Təhsil Nazirliyi İqtisadiyyat İnstitutunun icraçı direktoru iqtisadiyyat üzrə fəlsəfə doktoru, dosent Famil Rüstəmov deyib. O bildirib ki, növbəti illərdə bu istiqamətdə tədqiqatların daha da genişləndirilməsi məqsədəuyğun hesab olunur: “Xüsusilə şəhərləşmə proseslərinin iqtisadi nəticələri, urbanizasiyanın məşğulluğa və demoqrafik dinamikaya təsiri, yaşıl və ağıllı infrastrukturun regional inkişafda rolu, postkonflikt ərazilərində yeni yaşayış məkanlarının iqtisadi səmərəliliyi, “Ağıllı kənd” və “Ağıllı şəhər” modellərinin sosial-iqtisadi nəticələri kimi mövzular gələcək elmi araşdırmalar üçün aktual istiqamətlərdir. Doktorant və dissertantlara elmi mövzuların verilməsi zamanı da bu çağırışların nəzərə alınması vacibdir.
Ümumdünya Şəhərsalma Forumunun 13-cü Sessiyasının (WUF13) Bakıda keçirilməsi doktorantlar və gənc tədqiqatçılar üçün də mühüm imkanlar yaradır. Belə beynəlxalq platformalar onlara müasir şəhər iqtisadiyyatı, dayanıqlı inkişaf, mənzil siyasəti, iqlim dayanıqlığı, rəqəmsal idarəetmə və urbanizasiya proseslərinin iqtisadi nəticələri üzrə yeni tədqiqat mövzularına çıxış imkanı verir. Eyni zamanda, forum beynəlxalq ekspertlərlə əlaqələrin qurulması, elmi şəbəkələşmə və birgə tədqiqat ideyalarının formalaşması baxımından da faydalıdır”.
Famil Rüstəmov qeyd edib ki, institutda forumun mövzusu ilə bağlı elmi müzakirələr aparılır: “Elm və Təhsil Nazirliyi İqtisadiyyat İnstitutunun Gənc Alim və Mütəxəssislər Şurasının növbəti iclasında Demoqrafiya və məşğulluq problemləri şöbəsinin elmi işçisi Nüsrət İbrahimov “WUF13 kontekstində urbanizasiya proseslərinin demoqrafik nəticələri: urbanizasiya-demoqrafiya transformasiyası indeksi Azərbaycan timsalında” mövzusunda təqdimatla çıxış edib. Bu, WUF13 gündəliyinin institutun gənc tədqiqatçıları üçün də real elmi müzakirə mövzusuna çevrildiyini göstərir. WUF13 başa çatdıqdan sonra elmi-tədqiqat institutlarının qarşısında bu istiqamətdə daha sistemli və tətbiqi xarakterli araşdırmalar aparmaq vəzifəsi dayanır. “Yeni Şəhər Gündəliyi”nin icrasını izləmək üçün mənzil təminatı və əlçatanlığı, şəhər infrastrukturuna çıxış, nəqliyyat və mobillik, yaşıl zonalar, enerji səmərəliliyi, tullantıların idarə olunması, məşğulluq imkanları, şəhər və regionlar arasında inkişaf fərqləri, rəqəmsal xidmətlərə çıxış, şəhər mühitində innovativ ərzaq istehsalı modelləri və vətəndaş məmnunluğu kimi istiqamətlər üzrə də tədqiqatların aparılması nəzərdə tutulur.
İqtisadiyyat İnstitutu bu prosesə daha çox iqtisadi təhlil, strateji planlaşdırma, regional inkişaf, məşğulluq, investisiya səmərəliliyi, sosial-iqtisadi nəticələrin ölçülməsi və postkonflikt ərazilərində yeni yaşayış məkanlarının iqtisadi əsaslandırılması prizmasından töhfə verə bilər. Əsas məqsəd WUF13 çərçivəsində səslənən ideyaların elmi əsaslandırılmış siyasət tövsiyələrinə, tədqiqat proqramlarına və uzunmüddətli monitorinq mexanizmlərinə çevrilməsidir”.
Bölmənin digər xəbərləri
