“Xəzər üzərində yelləncək” müharibə və pandemiya dövründə sevgidən bəhs edən filmdir
Moskva, 3 fevral, AZƏRTAC
“YouTube” şəbəkəsində “Xəzər üzərində yelləncək” filminin çəkiliş prosesindən “səhnəarxası kadrlar” təqdim edilib. Bu səhnə əsərinin premyerası aprel ayına planlaşdırılıb. Azərbaycan, Rusiya və digər MDB ölkələrindən olan tamaşaçılar filmin çəkilişindən səhnələrlə tanış olublar.
Müvafiq linki xatırladırıq:
AZƏRTAC bu filmin süjetinin əsasını təşkil edən eyniadlı kitabın müəllifi və baş rolun ifaçısı Mariya Suvorovskaya ilə əlaqə saxlayıb. Yazıçı bütün dünya üçün mürəkkəb pandemiya dövründə belə bir sanballı filmin necə çəkilməsi və Azərbaycan auditoriyasının həmin filmi nə üçün belə səbirsizliklə gözləməsi barədə sualın cavabında deyib: “Həqiqətən məhdudiyyətlər çox idi. Filmin çəkilişi keçən il avqust-sentyabr aylarında, bütün təhlükəsizlik tədbirlərinə riayət edilməklə baş tutub. Maskasız işləyən yalnız aktyorlar idi. Bakı koloriti ilə zəngin, çox parlaq bir film alınıb. Auditoriyanın bu filmə marağı və onu səbirsizliklə gözləməsi onunla bağlıdır ki, sevgidən bəhs edən bu cür kinolar çoxdan yox idi. Ümidvaram ki, auditoriya bizim filmimizi səmimi qarşılayacaq. Bunun üçün qüvvəmizi və Azərbaycana sevgimizi əsirgəməmişik”.
COVID-19 virusunun bütün planetə hücum etdiyi indiki şəraitdə sevgi duyğuları daha kəskin olur, məhəbbət isə hər cür vaksindən güclü və ən sülhməramlı vasitədir. Pandemiya, qeyri-müəyyənlik, qorxu və təhlükə, lokdaun və iqtisadi qeyri-sabitlik kimi amillərlə dolu mürəkkəb bir ildə parlaq və həqiqi sevgidən bəhs edən nadir kino əsəri yaranıb.
Keçən ilin yayında günəşli Bakıda “Xəzər üzərində yelləncək” adlı film çəkilib. 2018-ci ildə eyniadlı kitab çapdan çıxıb və Azərbaycanda çox populyar olub. Kitabın müəllifi rus yazıçısı, Odlar Diyarına hədsiz məhəbbət bəsləyən Mariya Suvorovskayadır.
Onu Azərbaycanda çoxdan “ruhən bakılı, cismən moskvalı xanım” adlandırırlar. Yəqin elə bu səbəbdən azərbaycanlı prodüserlər filmdə baş rola çəkilmək üçün uzun-uzadı axtarışlardan sonra sınaq çəkilişini Mariyaya təklif ediblər. Yazıçı əvvəlcə bu təklifdən imtina edirdi. Ona görə ki, bu filmə hazırlıq üçün xeyli vaxt, qüvvə, müəyyən fiziki forma və necə deyərlər, transformasiya lazım idi. Doğrudur, Mariya gəncliyində teatr məktəbi keçib, amma filmdə çəkilməyi planlaşdırmırdı. Onu xeyli dilə tutdular, nəhayət Mariya dünya şöhrətli rejissor Qulu Əsgərovun yanında təlim keçəndən sonra prosesə qoşuldu.
Filmdə bəhs edilən hadisələr Moskvada və Bakıda cərəyan edir. Süjetin mərkəzində klassik sevgi üçbucağı mövzusu var: Taşa - Ruslan - Leyla. Yeri gəlmişkən, onların münasibətləri də klassik xarakter daşıyır. Əsərdə toxunulan problem təzə deyil, lakin müasir dövrdə də aktuallığını saxlayır.
Xəzər üzərində emosiyalar yelləncəyində puç olmuş minlərlə bu cür əhvalata oxşayan filmin süjeti bir daha xatırladır ki, dünyamız iki böyük sivilizasiyaya bölünür - Qərb və Şərq sivilizasiyaları. Hər biri öz yerində sərt qayalar kimi möhkəm dayanan, spesifik mədəni ənənələrə malik olan bu sivilizasiyaları hər şeyə - mental fərqlərə, valideynlərin və ictimaiyyətin fikirlərinə rəğmən həmişə mövcud olan sevginin köməyi ilə anlamaq və barışdırmaq mümkündür. Ona görə ki, həqiqi duyğular siyasətin, müharibənin fövqündə olur...
Bir mühüm faktı qeyd etməyi vacib bilirik: filmin çəkilişi Azərbaycanda hərbi vəziyyət elan edilməsi ərəfəsində başa çatıb. Hərbi münaqişə filmin ərsəyə gələcəyini şübhə altına almışdı. Lakin bütün çətinliklərə baxmayaraq bu film öz auditoriyasının görüşünə gəlməyə borclu idi, çünki indiki vaxtda bu filmə çox ehtiyac var. Cənubi Qafqazda sülh bərpa edilib və bu film baharda ekranlara çıxacaq.
Filmdə əsas kişi rolunu Şukin adına məktəbin tələbəsi, “Mister National Azerbaijan” titulunun sahibi Emil Həsənzadə ifa edib. Bu əhvalat Emilə həm də ona görə yaxındır ki, o, iki mədəniyyətin təmsilçisidir: anası rus, atası isə azərbaycanlıdır. Bu mənada, Emil “duyğuların tərcüməsinin çətinlikləri” ilə həyatda yaxşı tanışdır.
“Xəzər üzərində yelləncək” filminin hər bir kadrı sübut edir ki, insanlar arasında mental və mədəni fərqlər həqiqi sevgiyə və xoşbəxtliyə mane ola bilməz.
“Caspian Media Group” və “Biznes-dialoq media” şirkətləri tərəfindən çəkilmiş filmin rejissoru Qulu Əsgərov, baş prodüseri Hüseyn Cavadzadə, operatoru Rauf Qurbanəliyev, icraçı prodüseri Səadət Qarayevadır.
Fəridə Abdullayeva
AZƏRTAC-ın xüsusi müxbiri
Moskva
Bölmənin digər xəbərləri
