Xiyabanlarda tərənnüm edilən dostluq: Daşkənddəki Heydər Əliyev parkında gəzinti - REPORTAJ
Daşkənd, 17 iyun, AZƏRTAC
Daşkənddə axşam saatları Bakı axşamlarından tamamilə fərqlidir. Azərbaycan paytaxtında qaranlıq düşəndə izdihamın artması ilə şəhər canlanırsa, bu şəhərdə sükunət və nizam hökm sürür. Daşkənd küçələri izdihamlı deyil, amma buradakı ab-hava gəzinti həvəsi yaradır. Burada hava da başqadır; Bakının rütubətli iqlimindən fərqli olaraq, quru və daha yumşaqdır.
Gənc cütlüklər ara-sıra gəzişirlər, hərdən maşınlar da sanki təsadüfən keçir, çiçəklənən akasiya, yasəmən və ağacların incə ətri isə havaya hopur. Heç vaxt təsəvvür etməzdim ki, milyonlarla sakini olan paytaxt şəhəri bu qədər rahat və dinc ola bilər. Həm də bu rahatlıq Özbəkistanın paytaxtında Beynəlxalq İnvestisiya Forumu keçiriləcəyi vaxtda, Azərbaycanın rəsmi nümayəndə heyəti də daxil olmaqla bir çox ölkənin nümayəndələrinin qatıldığı tədbir ərəfəsində hiss olunur.
Heydər Əliyev adına küçəyə çıxırıq. Onun adı hər bir azərbaycanlıda xüsusi hisslər oyadır. Burada müxtəlif tədbirlərin müntəzəm olaraq keçirildiyi Azərbaycan Mədəniyyət Mərkəzi yerləşir və küçənin özü uzun müddətdir iki qardaş ölkə arasında humanitar əməkdaşlığın rəmzinə çevrilib.
Küçə çox abaddır və yaşıllıqla əhatə olunub. Geniş səkilər, səliqəli gül dibçəkləri, müasir abadlıq və qüsursuz təmizlik Şərq qonaqpərvərliyi ilə ahəngdar şəkildə birləşən Avropa nizamı hissi yaradır. Qızılı günbəzləri və qeyri-adi dekorativ elementləri olan pravoslav kilsələri ağacların arasından görünür. Onların əzəmətli siluetləri darvazalardakı və çəpərlərdəki Şərq ornamentlərini ahəngdar şəkildə tamamlayaraq müasir Daşkəndin özünəməxsus görünüşünü yaradır.
Elə buradaca qarşımızda Heydər Əliyev parkının möhtəşəm mənzərəsi açılır. Sıx yaşıllıqlar arasından Azərbaycanın Ümummilli Lideri Heydər Əliyevin əzəmətli büstü ucalır. Park Azərbaycan və Özbəkistan arasında dostluğun daha bir rəmzinə çevrilib, iki ölkə arasında sıx tarixi və mədəni əlaqələrin tərənnümüdür.
İlk addımlardan burada hər şeyin nə qədər diqqətlə düşünüldüyünü hiss edirsiniz. Axşam yaxınlaşdıqca, dekorativ fənərlər bu məkanı yumşaq, isti parıltı ilə dolduraraq yolları bəzəyir. Hətta gecənin gec saatlarında belə park işıqlı və rahatdır, sakitlik və təhlükəsizlik hissi yaradır.
Demək olar ki, hər küncdə səliqəli məişət tullantıları qutuları qoyulub ki, bu da ərazinin təmiz görünməsinə səbəb olur. Burada heç nə təsadüfən quraşdırılmayıb - hər şey öz yerindədir. Uşaqlı ailələrin, gənc cütlüklərin və yaşlıların istirahət etdiyi ərazidə rahat skamyalar var. Parkdakı ab-hava insanları dincəlməyə dəvət edir.
Hər tərəfdə həyat qaynayır. Uşaqlar xiyabanlarda konki və velosiped sürür, ailələr cığırlarda rahatca gəzişir və büstün yanında kameramızı görən şən bir körpə gülümsəyərək poza verməyə başlayır.
Məhz burada bir neçə yaşlı qadınla tanış oluruq və onlar bizə ən sevdikləri istirahət yerləri haqqında həvəslə danışırlar: “Biz bu parkı sevirik və demək olar ki, hər gün buraya gəlirik. Həmişə dinc, gözəl şərait var və nəfəs almaq asandır. Bu, Daşkəndin ən sevimli parklarından biridir”.
Elə bu anda qadınlardan birinin nəvəsi qəfildən qabağa qaçır, Heydər Əliyevin büstünün yanında dayanır və sevinclə bizə əl edir: “Burada, bu babanın yanında mənim şəklimi çəkin!”
Parka gələn digər yaşlı qonaqlarla söhbət edirik. Çoxları parkın kimin adını daşıdığını yaxşı bilir. Onlardan biri deyir: “Heydər Əliyev müdrik dövlət xadimi və ölkəsi üçün çox iş görmüş insan idi. Biz onun xatirəsinə hörmətlə yanaşırıq və bu park xalqlarımız arasındakı dostluğun rəmzidir”.
Gənclər də bizə tərəf gəlirlər. Yeni nəslin nə bildiyini öyrənmək də maraqlıdır.
Sevinc və Yasəmən adlı iki rəfiqəyə yaxınlaşırıq.
“Bilirik ki, Heydər Əliyev Azərbaycanın görkəmli lideri idi. Onun fəaliyyəti və Azərbaycanla Özbəkistan arasındakı dostluq haqqında hekayələri eşitmişik. Ona görə də belə gözəl parkın onun adını daşımasından məmnunuq”, - deyə qızlar bildirirlər.
Burada Tacikistanın iqtisadiyyat və ticarət nazirinin sabiq müavini Larisa Kislyakova ilə söhbətimiz xüsusilə yaddaqalan oldu. O etiraf etdi ki, Heydər Əliyev parkı onun Daşkənddəki ən sevdiyi məkanlardan biridir. Sıx iş qrafikinə və mütəmadi işgüzar səfərlərinə baxmayaraq, o, kölgəli cığırlarda gəzmək və bu parkın dincliyindən, sakitliyindən və xüsusi ab-havasından zövq almaq üçün imkan daxilində buraya gəlməyə çalışır.
Heydər Əliyev haqqında danışan Larisa Kislyakova onun şəxsiyyətinə və dövlətçilik irsinə dərin hörmətini vurğulayır, Ümummilli Liderin Azərbaycanın inkişafına və beynəlxalq əməkdaşlığın möhkəmləndirilməsinə verdiyi mühüm töhfəni qeyd edir.
O, həmçinin Azərbaycan haqqında xüsusilə səmimi danışaraq bildirir ki, Tacikistan xalqı Azərbaycan xalqına səmimi-qəlbdən rəğbət bəsləyir və ölkələrimiz arasında uzunmüddətli dostluq əlaqələrini yüksək qiymətləndirir.
Heydər Əliyev parkından ayrılanda başa düşürsən: ən parlaq təəssüratlar böyük hadisələrdən yaranmır. Onlar çiçəklənən akasiyanın ətrindən, sakit küçələrdən, mükəmməl təmiz xiyabanlardan, küçə işıqlarının yumşaq parıltısından, uşaqların gülüşlərindən, təsadüfi görüşlərdən və insanların səmimi təbəssümlərindən əmələ gəlir. Məhz bu cür detallar şəhərin əsl xarakterini formalaşdırır.
Müəllif - Tamilla Məmmədova
Bölmənin digər xəbərləri
