Xocalı faciəsi qurbanlarının 19-cu ildönümü ilə bağlı İzmirdə etiraz yürüşü keçiriləcəkdir
Bakı, 21 fevral (AzırTAc). “Xocalıya ədalət” kampaniyası çərçivəsində Xocalı soyqırımının 19-cu ildönümü ilə bağlı Türkiyənin İzmir şəhərində silsilə tədbirlər keçiriləcəkdir.
AZƏRTAC xəbər verir ki, fevralın 23-də Heydər Əliyev Fondunun Türkiyə nümayəndəliyinin, Azərbaycanın İstanbuldakı konsulluğunun, İzmirdəki Azərbaycan Mədəniyyət Dərnəyinin və azərbaycanlı tələbələrin təşkilatçılığı ilə keçiriləcək tədbirlərdə erməni vandallarının xalqımıza qarşı törətdikləri soyqırımı barədə ətraflı məlumat veriləcəkdir.
Fevralın 26-da İzmirdə yaşayan azərbaycanlıların və şəhər ictimaiyyətinin nümayəndələrinin iştirakı ilə etiraz yürüşü də keçiriləcəkdir.
Yürüşdə Xocalı soyqırımı barədə həqiqətlər faktlarla tədbir iştirakçılarının diqqətinə çatdırılacaqdır. Erməni vandallarının 1992-ci il fevralın 25-dən 26-na keçən gecə Xocalıda 83-ü uşaq, 106-sı qadın olmaqla 613 günahsız insanı amansızcasına qətlə yetirməsi faktı bəyan ediləcəkdir. Əsrin ən böyük cinayətlərindən biri olan bu faciənin bütün dünya tərəfindən tanınması, qəbul edilməsi tələb olunacaqdır.
“Xocalıya ədalət” kampaniyası çərçivəsində keçiriləcək yürüşdə İzmirin bir sıra ictimai birliklərinin nümayəndələrinin, azərbaycanlı və türk tələbələrinin Xocalı soyqırımı ilə bağlı çıxışları da gözlənilir.
Bölmənin digər xəbərləri
