Xocalı soyqırımı qurbanlarının xatirəsi Yerusəlimdə də yad edilib
Bakı, 24 fevral, AZƏRTAC
İsrailin Yerusəlim şəhərində Xocalı soyqırımının 30-cu ildönümü ilə əlaqədar anım tədbiri keçirilib.
Diasporla İş üzrə Dövlət Komitəsindən (DİDK) AZƏRTAC-a bildirilib ki, komitənin dəstəyi və “Azİz” İsrail-Azərbaycan Beynəlxalq Assosiasiyasının təşkilatçılığı ilə baş tutan tədbiri giriş sözü ilə açan “Azİz” Azərbaycan Mədəniyyət Mərkəzinin direktoru Yeganə Salman 1992-ci il fevralın 25-dən 26-na keçən gecə Ermənistan silahlı qüvvələrinin sovet ordusunun Xankəndidə yerləşən 366-cı alayının iştirakı ilə Xocalı şəhərində dinc və günahsız azərbaycanlılara qarşı törətdiyi dəhşətli soyqırımı barədə ətraflı məlumat verib. Vurğulanıb ki, Azərbaycan xalqı, İsraildə və dünyada yaşayan azərbaycanlılar bu il dərin hüzn və kədərlə ölkəmizin müasir tarixinə ən dəhşətli qətliam kimi həkk olunmuş faciənin 30-cu ildönümünü qeyd edirlər.
Knessetin deputatı, İsrail-Azərbaycan parlamentlərarası qrupunun sədri Elina Bardaç-Yalova, Milli Məclisin deputatı Sevil Mikayılova, “Pisqat Zeev” Qüds Mədəniyyət Mərkəzinin rəhbəri Yael Kohen, “Azİz” İsrail-Azərbaycan Beynəlxalq Assosiasiyasının prezidenti Lev Spivak çıxış ediblər.
“Yəhudilər sizi hər kəsdən yaxşı anlayır. Yalnız öz milli mənsubiyyətinə görə dinc əhalisinin vəhşicəsinə qətlə yetirilməsi ilə qarşılaşan Azərbaycan xalqının dərdinə şərik oluruq”, - deyə E.Bardaç-Yalova söyləyib.
Azərbaycanlı qonaqlar Xocalı faciəsi kimi acı ağrımıza şərik olduqlarına, “Xocalıya ədalət!” beynəlxalq kampaniyasına fəal şəkildə qoşulduqlarına, xalqımıza dəstək göstərdiklərinə görə İsrail dövlətinə və yəhudi xalqına minnətdarlıqlarını bildiriblər. Azərbaycan dövlətinin və xalqının ölkəmizin ərazi bütövlüyünü bərpa etdiyi, Cənubi Qafqaz bölgəsinə sülh gətirdiyi və dünyanın heç bir yerində müharibənin olmasını arzulamadığı diqqətə çatdırılıb.
Tədbir Azərbaycan və dünya musiqi klassiklərinin əsərlərindən ibarət konsert proqramı ilə davam edib. Əsərləri Azərbaycanın tanınmış pianoçusu, beynəlxalq müsabiqələr laureatı Fəqan Həsənli və israilli opera müğənnisi Kamelia Yoffe ifa ediblər.
Tədbir çərçivəsində Qarabağ və Xocalı soyqırımı həqiqətlərindən bəhs edən kitablar da nümayiş olunub.
Bölmənin digər xəbərləri
