QAN YADDAŞI
“XOCALI SOYQIRIMI: SƏBƏBLƏRİ, HƏYATA KEÇİRİLMƏ ÜSULLARI VƏ NƏTİCƏLƏRİ” KİTABININ TƏQDİMATI OLMUŞDUR
AZƏRTAC xəbər verir ki, fevralın 8-də Beynəlxalq Mətbuat Mərkəzində Boran Əzizin “Xocalı soyqırımı: səbəbləri, həyata keçirilmə üsulları və nəticələri” kitabının təqdimat mərasimi keçirilmişdir.
Bakı Dövlət Universitetinin tarix fakültəsi müəllimlərinin, Azərbaycan Milli Elmlər Akademiyası Tarix İnstitutu əməkdaşlarının, Xocalı rayon ictimaiyyəti nümayəndələrinin iştirakı ilə keçirilən tədbiri BDU-nun tarix fakültəsinin dekanı, dosent Sani Hacıyev açaraq, yeni kitabının işıq üzü görməsi münasibətilə müəllifi təbrik etmişdir. Bildirmişdir ki, Xocalı soyqırımına aid xeyli dəyərli bədii, publisistik, sənədli əsərlər yazılmışdır. Lakin indiyədək bu faciənin səbəblərini, qanlı olayın həyata keçirilmə üsullarını və nəticələrini özündə əks etdirən, tarixi təhlilə əsaslanan əsər yazılmamışdır. Kitab bu boşluğu qismən də olsa aradan qaldırmağa xidmət edir.
BDU-nun professorları Elmira Muradəliyeva, İbrahim Zeynalov və başqaları çıxış edərək, kitabı Xocalı soyqırımı faciəsinə həsr olunan dəyərli tədqiqat əsəri kimi dəyərləndirmişlər. Vurğulanmışdır ki, Xocalı soyqırımının baş verdiyi tarixi şərait və həyata keçirilmə üsulları, səbəbləri tarixi faktlar və sənədlər əsasında, müqayisəli şəkildə araşdırılmışdır. Sənədlərə əsaslanan müəllif çox doğru olaraq belə bir nəticəyə gəlmişdir ki, faciəni həyata keçirən təşkilatçının və sifarışçinin başlıca məqsədi xalqımızı müstəqillik yolundan döndərmək, Azərbaycanı yenidən özünün təsir dairəsinə qaytarmaqdan ibarət olmuşdur. Bu soyqırımda icraçı kimi iştirak edən və “Böyük Ermənistan” xülyası ilə yaşayan ermənilərin əsas məqsədi Qarabağı və ətraf əraziləri işğal etmək idi.
Tədbirin iştirakçılarına minnətdarlığını bildirən B.Əziz demişdir ki, Xocalı faciəsi kədər və hüznlə bərabər, həm də xalqımızın qəhrəmanlıq tarixidir. Müəllif demişdir ki, əsəri yazarkən Prezident İlham Əliyevin bu fikrini əsas götürmüşdür: “Xocalı faciəsi hadisə deyildi… Dəhşətli Xocalı faciəsini törətməklə ermənilər xalqımızı qorxutmaq, mübarizə əzmini qırmaq, onu tarixi torpaqlarımızın bir qisminin itirilməsi ilə barışmağa məcbur etmək istəyirdilər. Lakin hiyləgər düşmən məqsədinə çata bilmədi. Xalqımız öz dövlətinin suverenliyi və ərazi bütövlüyü uğrunda mübarizədə daha da mətinləşdi, qəhrəmanlıq və dəyanət nümayiş etdirdi”.
Kitabın elmi redaktoru tarix elmləri namizədi M.Abdullayevdir.