“Xocalı uşaqları, qan içində qar çiçəyi” kitabının təqdimatı olmuşdur
Bakı, 21 fevral (AZƏRTAC). Fevralın 21-də Beynəlxalq Mətbuat Mərkəzində Qarabağ QHT Koalisiyasının təşkilatçılığı ilə Xocalı soyqırımının 21-ci ildönümünə həsr edilmiş tədbir keçirilmişdir.
Tədbirdə Xocalı şəhidlərinin xatirəsi bir dəqiqəlik sükutla yad edilmişdir.
AZƏRTAC xəbər verir ki, tədbirdə Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının üzvü, Qarabağ QHT Koalisiyasının sədri Vüqar Qədirov, Milli Məclisin deputatları Elman Məmmədov, Flora Qasımova və başqaları çıxış edərək Xocalı qırğınının Azərbaycanın yeni tarixində ən böyük faciə olduğunu xatırlatmışlar. Bildirmişlər ki, 1992-ci il fevralın 25-dən 26-na keçən gecə Xocalı şəhərində ermənilərin törətdikləri soyqırımı aktı ölkənin tarixinə həmişəlik qanlı hərflərlə yazılmışdır. O soyuq qış gecəsində erməni silahlı dəstələri keçmiş sovet ordusunun 366-cı motoatıcı alayının Xankəndidə yerləşdirilmiş ağır texnikasının və şəxsi heyətinin köməyi ilə azərbaycanlıların yaşadıqları dinc şəhərə qəflətən hücum edərək onun əhalisinə amansızcasına divan tutmuşlar.
Tədbirdə Xocalı sakini, soyqırımının canlı şahidi, tanınmış yazıçı Səriyyə Müslümqızının “Xocalı uşaqları, qan içində qar çiçəyi” kitabının təqdimatı olmuşdur.
“Yazıçı” nəşriyyatında çapdan çıxmış povest Azərbaycan, rus və ingilis dillərində işıq üzü görmüşdür.
Bildirilmişdir ki, vətənpərvər yazıçının ürəyinin qanı ilə yoğurulmuş bu əsərini oxuyan hər kəs kitabda yer almış tarixi fotoşəkillərə baxdıqca o dəhşətli günləri yenidən xatırlayacaq və xalqımızın, o cümlədən onun körpə fidanlarının başına gətirilmiş müsibətlərin miqyasını bir daha dərk edəcəkdir.
Tədbirin iştirakçılarına minnətdarlığını bildirən müəllif həmvətənlərinin başına gətirilən müsibətlərin bundan sonrakı yaradıcılıq nümunələrində də əks olunacağını söyləmişdir.
Bölmənin digər xəbərləri
