Xorvatiya ilə strateji əməkdaşlığın genişləndirilməsi Azərbaycanın xarici siyasətinin mühüm elementlərindən biridir
Bakı, 8 sentyabr, AZƏRTAC
Xorvatiya Şərqi Avropanın kiçik amma çox mühüm geosiyasi mövqeyə malik ölkələrindən biridir. Xorvatiya da Azərbaycan kimi beynəlxalq nəqliyyat dəhlizləri layihələrinin reallaşdırılmasında ciddi uğurlara imza atıb. Ölkə ərazisindən Qərbi və Şərqi Avropa bölgəsini Asiya və Aralıq dənizi hövzəsi ilə birləşdirən 3 panavropa nəqliyyat dəhlizi keçir. Məhz bu amilə, eləcə də Şərqi Avropanın logistik həlqəsində strateji mövqeyə sahib olduğu üçün Xorvatiya bu il Avropa İttifaqı fondlarının 1,7 milyard avroluq maliyyə dəstəyi alıb, nəqliyyat dəhlizləri infrastrukturunun genişləndirilməsinə dair bir sıra müqavilələrə imza atıb.
Bu fikirləri AZƏRTAC-a açıqlamasında siyasi ekspert Elçin Mirzəbəyli deyib.
O bildirib ki, son illər Xorvatiyanın iqtisadiyyatında ciddi dəyişikliklər baş verib və sənayenin inkişafı ilə bağlı mühüm addımlar atılıb. Hazırda sənaye malları Xorvatiyanın idxalının 97 faizini təşkil edir. “Sənaye inkişaf etdikcə, şübhəsiz ki, enerji resurslarına, neft və təbii qaza olan tələbat da artır. Xorvatiya çox məhdud enerji resurslarına malik olduğu üçün ölkə iqtisadiyyatı demək olar ki, tamamilə enerji idxalından asılıdır. Bütün bu amillər, eləcə də Azərbaycanın enerji və nəqliyyat dəhlizləri ilə yürütdüyü uğurlu siyasət ölkəmizi Xorvatiya üçün cazibədar edir”,- deyə E.Mirzəbəyli vurğulayıb.
Onun sözlərinə görə, Şərqi Avropanın olduqca əlverişli strateji mövqeyə malik bir ölkəsi kimi Xorvatiya da Azərbaycan üçün önəm kəsb edən dövlətlərdən biridir. İki ölkə arasındakı münasibətlərin inkişafı da ilk növbədə qarşılıqlı faydalılıq prinsipləri üzərində qurulan əməkdaşlığın böyük perspektivə malik olmasından qaynaqlanır. O deyib: “Xorvatiya ilə strateji əməkdaşlığın genişləndirilməsi Azərbaycan Prezidentinin yürütdüyü və xalqımızın, dövlətimizin maraqlarını ifadə edən çoxvektorlu xarici siyasətin mühüm elementlərindən biridir. Daha əvvəl də qeyd etdiyim kimi, Xorvatiya Şərqi və Qərbi Avropanın nəqliyyat dəhlizləri şəbəkəsində mühüm strateji mövqeyə malikdir. Azərbaycan da hazırda Şərqlə Qərb arasında mühüm logistik mərkəz - körpü funksiyanı yerinə yetirir. Azərbaycan və Xorvatiyanın bu sahədə əməkdaşlıqlarının genişləndirilməsi, hər iki ölkənin ərazisindən keçən nəqliyyat dəhlizləri arasında sinerjinin yaradılması ciddi perspektivlər vəd edir”.
Ekspert bildirib ki, Xorvatiya Azərbaycan ilə Avropa İttifaqının münasibətlərinin inkişafına dəstək verən dövlətlərdən biri kimi ölkəmizlə bütün istiqamətlərdə əməkdaşlığın genişləndirilməsi təşəbbüsü ilə çıxış edir. Bu ölkə Azərbaycanın təkcə Cənubi Qafqaz regionu üçün deyil, daha geniş, subregional bir formatda mühüm strateji mövqeyə malik olduğunu başa düşür və düzgün qiymətləndirir. Xorvatiyanın coğrafi mövqeyi, bu ölkənin Adriatik dənizi sahilində yerləşməsi, İtaliyadan sonra ən böyük sahilyanı zolağa malik olması da onun logistik mərkəz kimi cazibədarlığını daha da artırır. Şübhəsiz ki, bütün bu amillər Azərbaycanın da Xorvatiya ilə münasibətlərinə önəm verməsini əsaslandıran amillərdir.
O bildirib ki, Xorvatiya həm də kənd təsərrüfatı ölkəsidir. Bu sahədən əldə olunan qazanc ölkə ÜDM-nin 20,6 faizini təşkil edir. Xorvatiyada istehsal olunan kənd təsərrüfatı məhsulları ölkənin bütün ehtiyacını təmin edir və hətta üstələyir. Bu baxımdan Xorvatiya təkcə Şərqi Avropanın deyil, bütövlükdə dünyanın kənd təsərrüfatı sahəsində yüksək məhsuldarlıq əldə etmiş ölkələrindən sayılır. Təsadufu deyil ki, Azərbaycan Prezidentinin səfəri çərçivəsində Azərbaycan Respublikasının Kənd Təsərrüfatı Nazirliyi ilə Xorvatiya Respublikasının Kənd Təsərrüfatı Nazirliyi arasında əməkdaşlıq haqqında Anlaşma Memorandumu imzalandı. E.Mirzəbəylinin fikrincə, Azərbaycan istər enerji, istər nəqliyyat dəhlizləri, istər kənd təsərrüfatı, istərsə də digər sahələr üzrə əməkdaşlıq müstəvisində öz tərəfdaşlarını ciddi araşdırmalar və təhlillər nəticəsində seçir. Məqsəd isə ölkə iqtisadiyyatının bütün sahələrini inkişaf etdirməkdən ibarətdir.
Bölmənin digər xəbərləri
