Xüsusi mühafizə olunan ərazilərdə ova qadağa qoyulmuşdur
Bakı, 4 iyun (AZƏRTAC). Xəbər verdiyimiz kimi, Azərbaycan Respublikası ərazisində 2012-2013-cü illər üçün ov mövsümü iyunun 2-dən açıq elan edilmişdir.
AZƏRTAC xəbər verir ki, bununla əlaqədar Ekologiya və Təbii Sərvətlər Nazirliyinin Bioloji Müxtəlifliyin Qorunması və Xüsusi Mühafizə Olunan Təbiət Ərazilərinin İnkişafı Departamenti direktorunun müavini Hikmət Əlizadə açıqlama vermişdir.
Nazirliyin rəsmisi bildirmişdir ki, təkənin (Zaqatala, Şəki, Qax, Quba ərazilərində), qabanın (Lənkəran, Astara, Lerik, Qax, Cəlilabad, Zaqatala, İmişli, Quba, Xaçmaz, Neftçala, Yardımlı, Şəki, İsmayıllı ərazilərində), dovşanın (Dəvəçi, Kürdəmir, Salyan, Neftçala, Cəlilabad, Biləsuvar, Yevlax, Lənkəran, Zaqatala, Ağstafa, Qazax, Zərdab, Masallı, Quba, Xaçmaz, İmişli, Sabirabad, Saatlı ərazilərində), bataqlıq qunduzunun, çaqqal və yenotun ovlanmasına icazə verilir.
Ov icazəsi Bakı Şəhər Ekologiya və Təbii Sərvətlər Departamentindən, ərazi ekologiya və təbii sərvətlər şöbələrindən alınmalıdır.
Ağdam, Göygöl, Goranboy, Daşkəsən, Gədəbəy və Tərtər rayonlarında, Xəzər dənizinin adalarında, yaşıl zonalarda, xüsusi mühafizə olunan ərazilərdə, şəhərlərin və kurortların ətrafındakı 1 kilometrə qədər sahələrdə ov qadağan edilmişdir.
Bölmənin digər xəbərləri
