Yağıntılı hava şəraiti bəzi ərazilərdə geoloji proseslərin dinamikasında aktivliyə səbəb olub
Bakı, 17 avqust, AZƏRTAC
Son günlərdə ölkə ərazisində müşahidə edilən yağıntılı hava şəraiti nəticəsində bəzi sürüşmə sahələri aktivləşib, o cümlədən yeni sürüşmə sahələri yaranıb.
Abşeron yarımadasında mövcud sürüşmə sahələrindən olan Suraxanı rayonunda Zığ-1-də aktivlik müşahidə olunur. Həmin ərazidə Qaraçuxur-Günəşli yaylası-Qum adası istiqamətində tektonik qirilma xətti üzərində tikilən binalarda deformasiyalar baş verib, gözlə görünən çatlar əmələ gəlib. Bundan əlavə, Abşeron rayonunun Masazır qəsəbəsində Zəli gölü adlanan ərazidə fəallıq davam edir. Həmin ərazidə 10-a yaxın ev qəzalı vəziyyətdədir. Nübar qəsəbəsində də sürüşmə-çökmə prosesinin dinamikasında aktivlik qeydə alınıb. Səbail rayonunda Bayıl sürüşmə sahəsində, yəni Bayıl dərəsinin sağ yamacında və Buxta küçəsində hazırda vəziyyət stabil olaraq qalır. Aparılan monitorinqlər zamanı çatlara və dəyişikliyə rast gəlinməyib.
Bu barədə AZƏRTAC-a Ekologiya və Təbii Sərvətlər Nazirliyinin Milli Geoloji Kəşfiyyat Xidmətinin Geoloji Planalma Ekspedisiyasının rəisi Əziz Qaralov məlumat verib.
“Sürüşməyə ən çox meylli ərazi olan Şamaxıda 48 A məhəlləsində son dövrlərdə atmosfer çöküntülərinin çox olması səbəbindən geoloji proseslərin dinamikasında-sürüşmə prosesində aktivlik artıb, hasarlarda uçma, evlərdə mövcud olan çatlarda genişlənmə baş verib. Həmin ərazidə iki ildən çoxdur ki, bu proseslər gedir. Bundan başqa, Ağsu aşırımının 156-cı km-də də çökmə və uçqun prosesi baş verib. Bakı-Şamaxı yolunun 106-111-ci kilometrliyində, Acıdərə adlanan ərazidə uçqun və çöküntü tipli geoloji proseslərdə aktivlik qeydə alınıb.
Şamaxının Çaylı və Qaleybuğurd kəndlərində uçqun tipli çökmə prosesi müşahidə olunur. Muğanlı-İsmayıllı magistral avtomobil yolunun
2-4-7-9-cu kilometrliklərində geoloji proseslərin dinamikasında aktivlik var. Muğanlı kəndinin girişində çökməyə bənzəyən proses aşkarlanıb, müşahidələr aparılır”,-deyə ekspedisiya rəisi diqqətə çatdırıb.
Ə.Qaralov cənub bölgəsindəki sürüşmə ərazilərində aparılan araşdırmaların nəticələri haqqında məlumat verib. O, bildirib ki, Lənkəran-Lerik yolunun 27-ci, 43-47-ci kilometrliyində sürüşmə prosesinin dinamikasında fəallıq qeydə alınıb. Masallı rayonunun Zuvand kəndində tektonik ərazilərdə evlər tikilib və həmin sahədə hazırda aktivlik müşahidə olunur.
Mütəxəssis ekspedisiya üzvlərinin qərb bölgəsində araşdırmalar apardığını və nəticələrin ayın sonunda hazırlanacaq bülletendə əks olunacağını da vurğulayıb.
Bölmənin digər xəbərləri
