Yalçın Hacızadə: Azərbaycan Zəfərə çoxşaxəli yollarla nail oldu
Bakı, 8 noyabr, AZƏRTAC
Azərbaycan Zəfərə çoxşaxəli yollarla nail oldu. Belə ki, Birinci Qarabağ müharibəsi nəticəsində torpaqlarının 20 faizi işğal olundu. Ölkəmiz isə bir milyona yaxın qaçqın və köçkün problemi ilə üzləşdi. Bunun başlıca səbəbi həmin dövrdə hakimiyyətdə olan səriştəsiz şəxslərin dövləti formalaşdıra bilməməsi oldu. Ulu öndər Heydər Əliyevin 1993-cü ildə hakimiyyətə gəlişi ilə bu istiqamətdə böyük irəliləyiş baş verdi. Əvvəlcə, vaxt qazanmaq məqsədilə atəşkəs elan olundu, sonra dövlət və ordu quruculuğu sahəsində təmərküzləşmə yaradıldı. Dövlət və ordu müxtəlif şəxslərdən, qruplardan təmizlənərək vahidləşdirildi. Planlı, düşünülmüş və uzunmüddətli nəticələrə hesablanmış uğurlu enerji siyasəti nəticəsində əldə olunan maddi imkanlar dövlətin və ordunun qurulmasında, möhkəmlənməsində böyük rol oynadı.
Bu fikirləri AZƏRTAC-a açıqlamasında Ana Vətən Partiyası sədrinin müavini Yalçın Hacızadə söyləyib.
Politoloq qeyd edib ki, Azərbaycanın xarici siyasətinin əsasını üzləşdiyi işğal faktını dünya ictimaiyyətinin diqqətinə çatdırmaq və danışıqların həllinin sülh yolu ilə aparılması təşkil edirdi. Bu məqsədlə ATƏT-in Minsk qrupu çərçivəsində uzunmüddətli müzakirələr aparıldı, işğalın sülh yolu ilə həll edilməsi üçün müxtəlif layihələr tərəflərə təklif edildi. Lakin bu danışıqların nəticəsiz olduğu görünürdü. Bu səbəbdəndir ki, dövlətimiz sülh danışıqları ilə yanaşı, müharibə variantını da unutmurdu. Doğrudur, bəzi ölkələr və beynəlxalq təşkilatlar Qarabağ məsələsinin müharibə variantının olmadığını dəfələrlə təkrarlayır, bunun ediləcəyi təqdirdə bizə qarşı müxtəlif sanksiyaların ola biləcəyi təəssüratını yaradır, olmaması üçün ölkəmizin öhdəlik götürməsini istəyirdilər. Amma Azərbaycan məqsədinə çatmaq üçün maraqlarına uyğun siyasi xəttini davam etdirirdi. Dövlət çox gözəl bilirdi ki, digər vasitələri təmin etmədən güclü Ordumuz olsa belə müharibədə qələbə əldə etmək və onu rəsmiləşdirmək qeyri-mümkündür. Ona görə də Azərbaycan qələbəyə aparan bir neçə yolu paralel şəkildə inkişaf etdirirdi.
“Müharibədən əvvəl aparılan danışıqlarda və digər platformalarda dövlətimizin başçısı dəfələrlə bildirdi ki, Azərbaycan işğal faktı ilə barışmayacaq. Ermənistanın danışıqlar prosesini imitasiya etməsi, qeyri-konstruktiv yanaşması və formalaşdırılan geosiyasi vəziyyət müharibəni qaçılmaz edirdi. Azərbaycan xalqı və Ordusu Ali Baş Komandanın torpaqlarımızın işğaldan azad edilməsi üçün “irəli” əmrini səbirsizliklə gözləyirdi. Müharibə dövründə Prezident İlham Əliyev ölkədə idarəçiliyin, siyasi, sosial-iqtisadi sabitliyin təmin olunmasında Prezident kimi vəzifələrini, döyüş meydanında strateji əməliyyatların qurulması və planlaşdırılmasında isə Ali Baş Komandan funksiyasını yerinə yetirdi. Həmçinin müharibənin gedişi ilə bağlı informasiya hücumunun təmin olunması, ölkənin xarici siyasətinin həyata keçirilməsi məqsədilə Baş diplomat kimi bütün vəzifələrinin öhdəsindən məharətlə gələrək Qələbəni təmin etdi”, - deyə Y.Hacızadə vurğulayıb.
O əlavə edib ki, Prezident İlham Əliyevin müharibə dövründə xarici kütləvi informasiya vasitələrinə verdiyi müsahibələr dünya mediasında geniş maraq doğururdu. Həmçinin dövlətimizin başçısının siyasi savadı, diplomatik bacarığı heyrətlə qarşılanırdı. Eyni zamanda, Prezident İlham Əliyevin müsahibə və çıxışları müharibə və ondan sonrakı dövrdə də regiondakı siyasi vəziyyəti, müzakirələrin xəttini və gündəmi formalaşdırmaqdadır.
Azərbaycan xalqı da 44 günlük Vətən müharibəsi dövründə hər günün sonunda qəhrəman Ordumuzun Qələbəsini, işğaldan azad etdiyi yerlər barədə Prezidentin tvitlərini səbirsizliklə gözləyir və böyük sevinclə qarşılayırdı.
Bölmənin digər xəbərləri
