Yalçın Rəfiyev: Qlobal Cənub iqtisadi-siyasi baxımdan inkişaf mərhələsindədir
Bakı, 14 may, AZƏRTAC
Azərbaycan xarici siyasətdə çoxtərəfliliyə hər zaman üstünlük verib və bu prinsipi ən çox dəstəkləyən ölkələrdən biridir. Bunun bir çox praktiki nümunələri son illərdə xüsusilə xarici siyasətimizdə özünü göstərib. Lakin hazırda bu proses, yəni çoxtərəflilik olduqca mürəkkəb bir dövrdən keçir. Ancaq bütün bunlara baxmayaraq, müəyyən proseslər, məsələn, Bakıda keçirilmiş COP29 tədbiri bir daha sübut edir ki, çoxtərəflilik hələ də işləkdir. Bu kimi beynəlxalq təşkilatların mövcudluğu və onların müəyyən qədər səmərəli fəaliyyəti dövlətlərarası münasibətlərə müsbət təsir göstərə bilir.
AZƏRTAC xəbər verir ki, bu fikirləri Milli Məclisin Beynəlxalq münasibətlər və parlamentlərarası əlaqələr komitəsinin genişləndirilmiş iclasında “Qlobal Cənubun yüksəlişi və Qərb: Azərbaycanın rolu, əməkdaşlıq və inkişaf üçün yeni imkanlar” mövzusunda keçirilən müzakirələr zamanı xarici işlər nazirinin müavini Yalçın Rəfiyev bildirib.
O qeyd edib ki, Qlobal Cənub inkişaf mərhələsindədir. Həm iqtisadi baxımdan, həm də siyasi nüfuzun və təsirin artması baxımından bu ölkələr yeni dövr yaşayırlar. Dünya əhalisinin 85 faizinin, qlobal ümumdaxili məhsulun isə 39 faizinin cəmləşdiyi bu ölkələr – Qlobal Cənub dövlətləri hazırda həm iqtisadi, həm də siyasi transformasiya dövründən keçirlər.
“Bunun nümunəsini bir neçə beynəlxalq təşkilatın timsalında görmək mümkündür. Xüsusilə də, son vaxtlar baş verən önəmli dəyişikliklərdən biri – “Böyük 20-lik” (G20) təşkilatının Afrika İttifaqını tamhüquqlu üzv kimi qəbul etməsidir. Bu, Afrikanın bir qitə olaraq artan nüfuzunun göstəricisidir. Digər bir nümunə isə BRICS təşkilatıdır. Əvvəlcə beş dövlətdən ibarət formatda yaradılmış bu təşkilat sonradan daha dörd tamhüquqlu üzv dövlətin qoşulması ilə genişlənib. Bu da BRICS-in artıq Qlobal Cənubun mühüm təmsilçilərindən birinə çevrildiyini göstərir”, - deyə Yalçın Rəfiyev əlavə edib.
Bölmənin digər xəbərləri
