YAPONİYA KONSTİTUSİYASI ONA NÜVƏ SİLAHINA MALİK OLMAĞI QADAĞAN ETMİR

16.10.2006 [11:56]
Çap et
A⁺ A^-

AZƏRTAC İTAR-TASS-a istinadla xəbər verir ki, Yaponiyanın hakim koalisiyasında əsas rol oynayan Liberal-Demokrat Partiyasının liderlərindən biri ölkənin nüvə silahına malik olması məsələsi barədə diskussiyalar keçirilməsinə tərəfdardır. LDP Siyasi Şurasının sədri, keçmiş iqtisadiyyat və sənaye naziri Sioiti Nakaqava oktyabrın 15-də televiziya ilə çıxışında vurğulamışdır ki, Yaponiya Konstitusiyası ölkənin nüvə silahına malik olmasını qadağan etmir.

Nakaqava Şimali Koreyanın nüvə sınağına münasibətini bildirərək demişdir ki, “məntiqə görə, nüvə silahına malik olmaq hücum obyektinə çevrilmək imkanını azaldır”. Lakin o etiraf etmişdir ki, “belə silaha malik olmağın mənfi cəhətləri də var”.

Pxenyanın nüvə sınağının ertəsi günü Yaponiyanın Baş naziri Sindzo Abe parlamentdə bəyan etmişdir ki, Tokio öz nüvə silahına malik olmaq niyyətində deyildir. O demişdir: “Bizim belə alternativimiz yoxdur. Üç qeyri-nüvə prinsipinə əsaslanan siyasətdə dəyişikliklər yoxdur və hökumət bu siyasəti dönmədən həyata keçirəcəkdir”.

Xatırladaq ki, üç qeyri-nüvə prinsipi – nüvə silahı istehsal etməmək, ona malik olmamaq və onu ölkəyə gətirməmək prinsipləri 1968-ci ildə Baş nazir Eysaku Satonun dövründə formalaşdırılmışdı. Buna görə o, Nobel sülh mükafatı almışdı.

Yaponiya böyük miqdarda plutoniuma malikdir və ondan nüvə silahı hazırlamaq üçün potensial surətdə istifadə edilə bilər.