AZƏRTAC xəbər verir ki, fevralın 23-də Yeni Azərbaycan Partiyası sədrinin müavini - icra katibi, Milli Məclisin deputatı Əli Əhmədov, parlamentin deputatları - icra katibinin müavini Siyavuş Novruzov və Ərəstun Cavadov Goranboy rayonunun Aşağı Ağcakənd qəsəbəsində məskunlaşan Xocalı sakinləri ilə görüşmüşlər.

Xocalı soyqırımının 16-cı ildönümü ilə əlaqədar keçirilən görüşü rayon icra hakimiyyətinin başçısı Şahmar Usubov açaraq bu hüznlü günlərdə onların yanında olan qonaqlara qəsəbə sakinləri adından minnətdarlıq etmişdir.

YAP sədrinin müavini - icra katibi Əli Əhmədov demişdir ki, Xocalı faciəsi nəinki bir millətə, eləcə də bütün bəşəriyyətə edilən təcavüzdür. Soyqırımını törədənlər cəzalarını alacaqlar. Son illər Azərbaycanın bölgədə lider dövlətə çevrilməsi, iqtisadi inkişafa görə dünyada aparıcı ölkələr sırasına çıxması onu deməyə əsas verir ki, respublikamız tərəqqi etdikcə onun qudrətli ordusu yaranır və hər an düşmənə zərbə endirərək öz torpaqlarını azad etmək imkanları genişlənir. Lakin ölkəmizin başçısı torpaqlarımızın sülh yolu ilə qaytarılmasının tərəfdarıdır və bu yolda bütün səylərini əsirgəmir.

Azərbaycanın uğurlu daxili və xarici siyasətinin xalq tərəfindən dəstəkləndiyini bildirən partiyanın icra katibi onu da vurğulamışdır ki, dövlətimizin başçısı məcburi köçkün həyatı yaşayan hər bir Azərbaycan vətəndaşının taleyi ilə daim maraqlanır. Onların həyat tərzi, sosial-məişət şəraiti heç vaxt ölkəmizin rəhbərinin diqqətindən yayınmır. Məhz bunun nəticəsidir ki, dövlətimizin başçısı ötən prezident seçkiləri zamanı verdiyi “2007-ci ilədək bir dənə də olsun çadır şəhərciyi qalmayacaqdır” vədinə əməl etdi. Uzun illər səfalət içərisində yaşayan köçkün insanlar indi hər cür rahatlığı və məişət şəraiti olan mənzillərlə təmin edilmişlər. Bəzən sual verirlər ki, əgər köçkünlər öz ata-baba yurdlarına qayıdacaqlarsa, onda bu evlərin tikintisinə nə ehtiyac var? Həmişə də ölkəmizin başçısının bu suala bir cavabı olub: Hər bir Azərbaycan vətəndaşı bir gün də olsa rahat mənzildə yaşamalıdır.

Dünya birliyi ölkələrinin Azərbaycan torpaqlarının 20 faizini işğal edən Ermənistana ciddi təzyiq göstərməməsindən danışan Əli Əhmədov bunun ədalətsizlik olduğunu bildirmiş və demişdir ki, doğrudur, bir neçə təşkilat münaqişənin həlli istiqamətində vasitəçilik missiyası həyata keçirir. Lakin təəssüflər olsun ki, həmin təşkilatların səyləri də hələ nəticə vermir. Elə buna görə də Prezident İlham Əliyev son çıxışlarında münaqişənin həlli ilə bağlı dünya birliyi ölkələrinə sərt mesajlar vermişdir.

YAP-ın icra katibi əsası ümummilli liderimiz Heydər Əliyev tərəfindən qoyulan və Prezident İlham Əliyevin uğurla davam etdirdiyi neft strategiyasının uğurlarından danışarkən demişdir ki, indi bu layihələr Azərbaycana, hər bir Azərbaycan vətəndaşına xidmət edir. Gəlirlər artdıqca insanların həyat tərzi də yaxşılaşır. Respublikamızın şəhər və kəndləri öz simasını dəyişir. İnfrastruktur yaxşılaşır. Hər şeydən əvvəl isə güc və qüdrətimiz artır. Bu sürətli inkişaf isə bizi doğma Qarabağımıza daha da yaxınlaşdırır.

Yığıncaqda qəsəbə sakinləri, Xocalıda bir neçə ailə üzvünü itirmiş Almaz Səlimova, ölkənin ağır sınaq illərində, 1992-ci ildə televiziyaya çıxaraq çəkinmədən və cəsarətlə “Bizə Heydər Əliyev lazımdır” deyən Şükür Bəşirov, yazıçı Allahyar Xocalı və başqaları çıxış edərək demişlər ki, bütün xocalılılar ölkəmizin başçısının ətrafında sıx birləşmişlər. Çünki bilirlər ki, onları bu köçkünlük həyatından yalnız o qurtara bilər. Odur ki, qarşıdan gələn prezident seçkilərində yalnız ona səs verəcəklərini bildirmiş və ölkəmizin başçısına uğurlar arzulamışlar.

Tədbirdə qəsəbənin problemlərinin həlli ilə bağlı təkliflər də irəli sürülmüşdür.

Həmin gün Yeni Azərbaycan Partiyası Xocalı məktəbinə bir dəst kompyuter və 200 ailəyə un yardımı etmişdir.