Bakı, 14 dekabr, AZƏRTAC

Yeni ilə sayılı günlər qalır. Artıq ölkəmizdə bayram ovqatlı rəngarəng tədbirlərə start verilib. Bunlardan biri də Fəvvarələr meydanında açılmış “Soyuq əllər, isti ürək” xeyriyyə yarmarkasıdır. Yarmarkada xodulistlər, jonqlyorlar, müxtəlif nağılların qəhrəmanları, sevilən cizgi filmlərinin personajları, animatorlar, musiqiçilər hər kəsi soyuq qış günündə sevindirir.

AZƏRTAC-ın əməkdaşı “Soyuq əllər, isti ürək” xeyriyyə yarmarkasında olub və orada iştirak edən insanların Yeni il təəssüratlarını öyrənib.

Yeni ili həmişəkindən daha gözəl qarşılamaq istədiyini bildirən, satış təmsilçisi Təzəgül Mustafayeva təzə ildən gözləntilərinin çox olduğunu deyib: “Burada təmsil etdiyimiz şirkətin məhsullarının satışı ilə məşğul oluruq. Toplanan ianələr isə xeyriyyə məqsədi üçün xərclənəcək. Yeni ildə xalqımıza gözəl günlər və firavan həyat diləyirəm”.

Bakının gözəl məkanlarından birində təşkil olunmuş bu yarmarkaya tələbələr də tez-tez üz tutur. Onlar boş vaxtlarında burda alış-veriş edir və dostları ilə maraqlı gün keçirirlər.

Vətən müharibəsində şanlı Zəfərə imza atmış bir ölkənin vətəndaşı olmağından qürur duyduğunu söyləyən Gülşən Quliyeva da belə tələbələrdəndir. O deyir: “Bu şanlı Qələbəmizə görə şəhidlərimizə Allahdan rəhmət diləyirəm və qazilərimizə də sağlam həyat arzulayıram. Müzəffər Ordumuzun doğma Qarabağı düşmən tapdağından azad etməsi xalqımızın əhval-ruhiyyəsini daha da yüksəltdi. Bu olduqca qürurvericidir. Üzümüzə gələn Yeni ildə azad olunmuş torpaqlarımız daha da abadlaşacaq və həmvətənlərimiz öz ata-baba yurdlarına köçəcəklər. Builki xeyriyyə yarmarkası çox gözəl təşkil olunub. Belə layihələrin ölkəmizdə davamlı olmasını arzulayıram”.

Qeyd edək ki, 2023-cü il yanvarın 15-dək davam edəcək yarmarka əhali arasında “Bakının qış nağılı” kimi də tanınır. Bunun səbəbi sadəcə yarmarkanın unikal Yeni il konsepti deyil, həmçinin keçirilmə məqsədidir. Belə ki, “Soyuq əllər, isti ürək” ölkənin hər yerindən “Nargis” Fonduna müraciət edən onlarla ailəyə yenidən ümid bəxş edir. Hər il olduğu kimi yarmarka sponsorlarının maliyyə dəstəyi və burada qurulan evlərin kirayəsindən toplanan bütün vəsait müxtəlif xəstəliklərdən əziyyət çəkən uşaqların müalicə və əməliyyat xərclərinin qarşılanmasına sərf edilir.

Yarmarkanı əsl qış nağılı kimi təsvir edənlərdən biri də rəssam Aydan Məmmədovadır. Burada artıq iki ildir iştirak etdiyini deyən həmsöhbətim “FaceArt” işi ilə məşğul olduğunu bildirir: “Mən burada balacaları sevindirirəm. Çox güman ki, Yeni ili iş başında qarşılayacağam. Yarmarkada bayram əhval-ruhiyyəsi yüksək səviyyədə hiss olunur. Şəhərimizin sakinləri və qonaqları buradakı gözəllikdən zövq alırlar. Bu bayramda ən çox sevinənlər isə uşaqlardır”.

Xeyriyyə yarmarkasında iştirak etməklə bu layihəyə öz töhfələrini verdiyini bildirən şirkət təmsilçisi Ayaz Rüstəmov deyir ki, bayram ərəfəsində hər gün gənclərin burada şənləndiyini müşahidə edir. Təbii ki, bu, çox xoş təsir bağışlayır: “Buradan toplanan ianələr xəstə və ehtiyacı olan uşaqlara yönləndirilir. Bu isə çox gözəl təşəbbüsdür. Burada olan evciklərin sayı ilbəil artır və iştirak etməyə, bu gözəl təşəbbüsün bir hissəsinə çevrilməyə hamı həvəs göstərir”.

Eşitdiklərimiz, gördüklərimiz bizi olduqca məmnun edir. Deməli hamılıqla mərhəmətli olmağa, xeyirxah təşəbbüslərə dəstək göstərməyə çalışırıq. Bu olduqca qürurvericidir. Kiminlə söhbət ediriksə hamı bir nəfər kimi bu işə ürəklə qoşulduğunu vurğulayır.

Yarmarkada əl işlərindən ibarət stendlə təmsil olunan kiçik sahibkar Fəxriyyə İbrahimova hazırladığı əl işlərinin təbii daşlardan ibarət kişi və qadın aksesuarları olduğunu deyir. Artıq 11 ildir ki, fasiləsiz olaraq bu işlə məşğul olduğunu söyləyən həmsöhbətim bildirir ki, bu iş heç də asan deyil, çünki burada həm rəng ahəngi, eləcə də təbii daşların düzgün seçilərək zərgər dəqiqliyi ilə yığılması mühüm əhəmiyyət daşıyır. Bəlkə də bu zəhmətin bəhrəsidir ki, stendimizə yaxınlaşanlar gördüyümüz işlərdən çox məmnun qalırlar: “Bu mənim üçün bir biznesdir və bundan çox məmnunam. Dövlətimiz də bizim kimi sahibkarlara hər cür şərait yaradır”.

On ildən çoxdur ki, bu xeyriyyə yarmarkası təşkil olunur və nə xoş bizə ki, ilk dəfə olaraq bu yarmarkada iştirakçı hüququ qazanmışıq deyən satış meneceri Yusif Fərman burada ziyarətçilərə xidmət göstərməkdən çox məmnun olduğunu vurğuladı: “Yeni ili çox güman ki, iş başında qarşılayacağıq. Balacalar bu bayramda çox əylənirlər. Bu tanış və xoş bir mənzərədir. Arzu edirəm ki, gənclərimiz pis vərdişlərdən uzaq olsunlar və tam sağlam həyat yaşasınlar. Xalqımıza firavan həyat və əmin-amanlıq arzu edirəm”.

Hansı köşkə üz tuturuqsa bizi böyük sevinclə qraşılayırlar. Elə bil ən doğma, munis adamlarla görüşürük. Sanki yarmarka Yeni il ərəfəsində insanları bir-birinə daha da doğmalaşdırıb...

Öz xidmətləri ilə xeyriyyə aksiyasına töhfə verdiyini deyən restoran meneceri Humay Rüstəmzadə bildirir ki, buradan toplanan ianələrin xəstə uşaqların sağlamlığına yönəldilməsi onu daha böyük həvəslə işləməyə sövq edir. Bu çox gözəl təşəbbüsdür və təqdirə layiq addımdır. Düşünürəm ki, belə layihələr çox olmalıdır”.

Burada olarkən bir daha müşahidə edirik ki, ziyarətçilər arasında Yeni il əhval-ruhiyyəsi olduqca yüksək səviyyədədir. Təşkil olunmuş xeyriyyə yarmarkasına yerli vətəndaşlar kimi xarici qonaqların da marağı və kütləvi axını müşahidə olunur.

Kofe xidmətindən ibarət satış evi ilə yarmarkada təmsil olunan kofe brendinin təsisçisi Tural Ağarzayev də müşahidələrimizi təsdiqləyir. Bildirir ki, onların təklif etdikləri məhsullara maraq çox böyükdür. Burada onlar müştərilərə həm yerli, həm də dünya mətbəxinin təamlarını təqdim edirlər.

Yarmarkada maraqlı vaxt keçirən şəhər sakinləri Zahid Bayramov, Vəli Səmədov və başqaları 44 günlük Vətən müharibəsinin xalqımızda yaratdığı özünəinam hissindən ürək dolusu danışırlar.

Belə layihələrin çox olmasını arzulayan həmsöhbətlərim ölkəmizin ildən-ilə qüdrətləndiyini, inkişaf etdiyini söyləyirlər. Xüsusi olaraq vurğulayırlar ki, bu inkişafın əsasında Ulu Öndər Heydər Əliyevin layiqli davamçısı Prezident İlham Əliyevin apardığı uğurlu daxili və xarici siyasət durur.

Yeri gəlmişkən qeyd edək ki, hər bir yarmarkanın maliyyə hesabatı və nəticələri haqqında ətraflı məlumat Fondun rəsmi https://nargisfund.com/ veb-saytı və sosial şəbəkə hesablarında paylaşılır. Bu ildən etibarən yarmarka ərazisində hər bir böyük evin üzərində quraşdırılmış xüsusi QR kodu skan edərək ötən illərdə keçirilmiş yarmarkaların dəstəyi ilə əməliyyat olunmuş uşaqların hekayələri ilə ətraflı tanış olmaq mümkündür.

“Soyuq əllər, isti ürək” xeyriyyə yarmarkasında vaxtın necə keçdiyindən xəbər tutmadım, şirin söhbətlərə, bir-birindən maraqlı əyləncə dolu təqdimatlara başım elə qarışdı ki, bir də baxdım hava çoxdan qaralıb, artıq gedib reportajı hazırlamalıyam. Özümə söz verdim ki, işdən vaxt tapan kimi yenə yarmarkaya üz tutacam, çünki burada insan rahatlıq tapır, həm də əsl Yeni il ab-havası yaşayır.

Emil Məlikov

AZƏRTAC-ın müxbiri