Yeni Zelandiya 2034-cü ilədək beynəlxalq təhsil bazarını ikiqat artırmaq niyyətindədir
Bakı, 14 iyul, AZƏRTAC
Yeni Zelandiya hökuməti 2034-cü ilə qədər beynəlxalq təhsil bazarını iki dəfə artırmağı planlaşdırır.
AZƏRTAC xəbər verir ki, bu ölkənin təhsil naziri Erika Stenford 2023-cü ildən etibarən beynəlxalq tələbələrin sayının durmadan artması ilə hökumətin 2034-cü ilə qədər 4,32 milyard dollar gəlir əldə etmək üçün “bu artımı sürətləndirmək” istədiyini bildirib.
Bu bəyanat Avstraliya və ABŞ kimi beynəlxalq tələbələr üçün məşhur istiqamətlərin əcnəbi tələbə sayını azaltmağa çalışması və rəqabətli bazarlardakı universitetlərin həmin məhdudiyyətlərdən yararlanmaq istəməsi fonunda verilib.
Nazir Stenford əlavə edib: “Yeni Zelandiyanın Təhsil Nazirliyi qısamüddətli perspektivdə öz reklam səylərini daha çox artım potensialı olan bazarlarda cəmləşdirəcək”.
Yeni Zelandiyanın beynəlxalq təhsil bazarı hazırda iqtisadiyyata və hökumətə 2,15 milyard dollar gəlir gətirir. Hökumət beynəlxalq tələbələrin sayını 2024-cü ildəki 83 min 700-dən 2027-ci ildə 105 minə, 2034-cü ilə qədər isə 119 minə çatdırmağı, bu prosesin iqtisadiyyata töhfəsini iki dəfə artırmağı planlaşdırır.
Yeni Zelandiyaya daha çox beynəlxalq tələbə cəlb etmək üçün hökumət uyğun əcnəbi tələbələr üçün əlavə iş saatlarını artırmağı və təsdiq edilmiş mübadilə və ya xaricdə təhsil proqramları üzrə bütün ali təhsilli tələbələrin məşğulluq hüquqlarını genişləndirməyi planlaşdırır.
Zəif iqtisadi artımla mübarizə aparan Yeni Zelandiya üçün bu addım rəqəmsal köçü təşviq etmək və xarici sərmayələri cəlb etmək üçün viza rejiminə edilən dəyişikliklərdən sonra iqtisadiyyatı yaxşılaşdırmaq istiqamətində həyata keçirilən silsilə tədbirlərin sonuncusudur.
Bölmənin digər xəbərləri
