YER KÜRƏSİNDƏKİ VƏHŞİ HEYVANLARIN ƏN NƏHƏNGİNİN QALIQLARI TAPILMIŞDIR

11.02.2006 [13:23]
Çap et
A⁺ A^-

AZƏRTAC xarici KİV-lərə istinadla xəbər verir ki, timsahdakına bənzər çənəli spinozavr indiyədək Yer kürəsində yaşamış bütün vəhşi heyvanlardan ən nəhəngi sayılmışdır. O, tiranozavrı üçüncü, əvvəllər ən iri yırtıcı sayılan giqantozavrı isə ikinci yerə sıxışdırmışdır. Qalıqları bu yaxınlarda tapılan spinozavrın uzunluğu 17,1 metr, çəkisi isə 8 ton olubmuş. Digər iri yırtıcılar onun yanında cırtdana bənzəyirmişlər. Bu dəhşətli bədheybət təxminən 100 milyon il əvvəl bataqlıqlarda, Böyük Səhradakı çayların sahillərində məskunlaşıbmış. Onun qalıqlarının tədqiqi vəhşi heyvan üçün qeyri-adi xüsusiyyəti müəyyənləşdirmişdir. Sən demə, spinozavr, əsasən, balıqla qidalanırmış.

Tiranozavr və giqantozavr kimi, spinozavr teropodlara – quşları törədən dinozavrlar qrupuna aiddir. Onun belində dəridən yaranmış “yelkəni” saxlayan 6 fut hündürlüyündə oxları, qəniməti ələ keçirmək üçün nisbətən iri qabaq pəncələri varmış.

Kəllə sümüyü fraqmentlərinin analizi göstərmişdir ki, 2001-ci ildə çəkilmiş “Yura dövrünün parkı” filmindəki tiranozavr-spinozavr döyüşündə sonuncunun ölçüləri xeyli kiçildilmişdir. Britaniya Təbiət Tarixi Muzeyinin dinozavrları öyrənən əməkdaşı doktor Pol Barratt demişdir: “Bu qalıqların ölçüləri göstərir ki, spinozavr indiyədək Yer kürəsində yaşamış ən böyük yırtıcıdır”.

Kristiano Dal Sasso və onun Milan Təbiət Tarixi Muzeyindəki həmkarları Mərakeşdə tapılan spinozavrın başının qalıqlarını tədqiq edərək belə qənaətə gəlmişlər ki, bu yırtıcının kəlləsinin uzunluğu 5 fut 9 düym olmuşdur.

YER KÜRƏSİNDƏKİ VƏHŞİ HEYVANLARIN ƏN NƏHƏNGİNİN QALIQLARI TAPILMIŞDIR

MÜƏLLİFLƏ ƏLAQƏ

Bölmənin digər xəbərləri