Yüksək Texnologiyalar Parkında hidroizolyasiya məhsullarının istehsalı təşkil ediləcək
Bakı, 27 iyul, AZƏRTAC
AMEA Yüksək Texnologiyalar Parkının (YT Park) Ekspertlər şurasının növbəti onlayn iclası keçirilib.
YT Parkdan AZƏRTAC-a bildirilib ki, tədbiri açan AMEA-nın vitse-prezidenti, Şuranın sədri, akademik Rasim Əliquliyev iclasın “AZOil Industry” MMC-nin YT Parkın rezidenti kimi qeydiyyata alınması məsələsinin müzakirəsinə həsr olunduğunu deyib.
Sonra “AZOil Industry” MMC-nin direktor müavini Rəşad Abbasov çıxış edərək YT Parka təqdim etmək üçün hazırlanmış “Hidroizolyasiya məhsullarının istehsalının təşkili yönümlü investisiya” layihəsi haqqında məlumat verib.
O, investisiya layihəsinin texnoparkın ərazisində icarəyə götürülmüş torpaq sahəsində hidroizolyasiya məhsullarının istehsalının təşkil olunması üçün işlənib-hazırlandığını deyib. Daxili bazarda bu məhsullara olan yüksək tələbatı nəzərə alaraq keyfiyyətli və rəqabətədavamlı məhsullar istehsal etməyin əsas hədəflərdən olduğunu diqqətə çatdırıb.
R.Abbasov layihə çərçivəsində istehsal olunacaq məhsulların həm daxili bazarda, həm də xarici ölkələrdə satışının nəzərdə tutulduğunu deyib. Direktor müavini layihəyə cəlb olunacaq ərazinin tələb olunan bütün kommunikasiya (elektrik, qaz, su və kanalizasiya, telefon və s.) xətləri ilə tam təmin olunduğunu vurğulayıb.
O bildirib ki, əhalinin tikinti materiallarına tələbatının yerli istehsal hesabına təmin olunması ölkənin iqtisadi siyasətinin əsas istiqamətlərindən birini təşkil edir. Yeni layihə həm də əhalinin keyfiyyətli tikinti materialları, o cümlədən hidroizolyasiya məhsulları ilə təmin olunmasına, idxaldan asılılığın azalmasına imkan yaradacaq, ölkənin ümumi ixrac potensialının güclənməsində mühüm rol oynayacaq.
R.Abbasov, həmçinin layihə üzrə hidroizolyasiya məhsullarında istifadə ediləcək materiallar, nəzərdə tutulan əsas işlərin mərhələləri, məhsulun xarakteristikası, istehsal gücü və istehsal həcmi haqqında məlumatları iclas iştirakçılarının diqqətinə çatdırıb.
Sonra layihə ətrafında müzakirələr aparılıb.
Müzakirələrdə iştirak edən Ekspertlər şurasının üzvləri - akademiklər Rasim Əliquliyev, Vaqif Fərzəliyev, Cavad Abdinov, AMEA-nın müxbir üzvləri Oktay Qasımov, Bəxtiyar Məmmədov və texnika üzrə fəlsəfə doktoru, dosent Rəşid Ələkbərov hidroizolyasiya məhsullarının istehsalının təşkili yönümlü investisiya layihəsinin istehsalının genişləndirilməsi, bu məhsulların ekoloji təhlükəsizliyinin təmin olunması, xarici bazardan asılılığın azaldılması, xammalın tərkibi və keyfiyyət göstəriciləri ilə bağlı suallarla çıxış ediblər.
Ekspertlər şurasının üzvləri layihəni dəstəklədiklərini bildirərək, “AZOil Industry” MMC-nin AMEA-nın aidiyyəti institut və təşkilatları ilə birgə fəaliyyətinin daha səmərəli nəticələr verəcəyinə, layihənin uğurlu inkişafına imkan yaradacağına əminliklərini ifadə ediblər.
Akademik Rasim Əliquliyev öz çıxışında “AZOil Industry” MMC-nin fəaliyyətini yüksək qiymətləndirib: “AMEA YT Parkda fəaliyyət göstərmək həm də bu qurumun qarşısına böyük məsuliyyət qoyur. Bu, o deməkdir ki, layihə çərçivəsində elm və innovasiya əsaslı, rəqabətədözümlü məhsullar istehsal ediləcək”.
R.Əliquliyev Ekspertlər şurasının səsləndirdiyi suallar və aparılan müzakirələrin layihənin uğurla icra edilməsinə təkan verəcəyini də vurğulayıb.
Daha sonra YT Parkın baş direktoru Vasif Abbasov çıxış edərək “AZOil Industry”nin AMEA-nın Aşqarlar Kimyası, Neft-Kimya Prosesləri, Polimer Materialları institutları ilə əməkdaşlıq əlaqələrinin təşkilinin əhəmiyyətini önə çəkib.
Sonda “AZOil Industry” layihəsinin YT Parkın rezidentliyinə qəbul edilməsi ilə bağlı səsvermə keçirilib. Səsvermənin nəticələrinə əsasən, adıçəkilən iddiaçıya rezident statusu verilməsi yekdilliklə qərara alınıb.
Bölmənin digər xəbərləri
