İQTİSADİYYAT
YUNFPA-NIN DÜNYA ŞƏBƏKƏSİ ÇƏRÇİVƏSİNDƏ TEXNİKİ YARDIM
BMT-nin Əhali Fondu (YUNFPA) 2002-ci ildə Azərbaycanda Ölkə proqramını həyata keçirməkdə texniki yardım göstərmək üçün dünyanın müxtəlif qitələrində işləyən mütəxəssislərin xidmətlərindən istifadə etmişdir.
Fondun ofisindən AZƏRTAC-ın müxbirinə bildirmişlər ki, monitorinqi hazırlamaq və keçirmək üçün bu təşkilatın Bratislavadakı əməkdaşları Rayner Rozenbaum və Qoldfrey Volker cəlb edilmişlər. Onların köməyi ilə Proqramın müxtəlif hissələrinə obyektiv qiymət vermək mümkün olmuşdur. Bundan əlavə, YUNFPA-nın Katmandudan olan mütəxəssisi Cesi Brand ən mühüm məsələlərdən birinin - Azərbaycanda ailə planlaşdırması məsələsinin proqnozlaşdırılması üzrə treninq kursları keçirmişdir.
Texniki yardımla yanaşı, Proqramın həyata keçirilməsinə 686 min dollar məbləğində maliyyə vəsaiti ayrılmışdır. Əhalinin kontraseptivlərlə təmin edilməsi ilə əlaqədar Böyük Britianiya və Hollandiya hökumətləri reproduktiv sağlamlıq layihəsi çərçivəsində 182 min dollar ayırmışlar.