Bakı, 9 avqust, AZƏRTAC

“Zirə”nin səfərdə heç-heçə etməsi uğurlu nəticədir, “Sabah” məğlub olsa da, növbəti mərhələyə adlamaq şansı var.

Bu fikri AZƏRTAC-a açıqlamasında veteran futbolçu Yunis Hüseynov “Zirə” və “Sabah” komandalarının UEFA Avropa Konfrans Liqasının III təsnifat mərhələsindəki şanslarını dəyərləndirərkən deyib.

Mütəxəssis cavab oyununda “Zirə”nin “Osiyek”i (Xorvatiya) doğma meydanda rahatlıqla məğlub edəcəyini düşünür: “Rəşad Sadıqovun komandası ötən gün yaxşı mübarizə apardı. Son dəqiqədə vurduqları qolla məğlubiyyətə layiq olmadıqlarını göstərdilər. Fikrimcə, bu gedişlə “qartallar” pley-off mərhələsində potensial rəqibləri olan “Omoniya” (Kipr) –“Fehervar” (Macarıstan) cütünün qalibinin güclüsünü də məğlub edəcəklər. Böyük ehtimal Kipr klubu bizə rəqib olacaq”.

Azərbaycan millisinin sabiq hücumçusu “Sabah”ın ötən gün “Sent Patriks Atletik”lə (İrlandiya) oyunda müdafiədə səhvlər etdiyini söyləyib: “Makkabi” ilə cavab qarşılaşmasında da müdafiədə həmin səhvlər oldu. Lakin “bayquşlar” bəxt hesabına növbəti mərhələyə adladılar. İrlandiyadakı görüşə gəlincə, qırmızı vərəqənin komandaya mənfi təsiri oldu. Baxımlı matç izləməsək də, “Sabah”ın cavab oyununda qalib gələcəyini düşünürəm. Görünən odur ki, III raundu keçsək, növbəti mərhələdə “Başakşəhər”lə üz-üzə gələcəyik. Məncə, Türkiyə klubunu da üstələyə bilərik”.

Qeyd edək ki, “Zirə” və “Sabah” komandaları cavab oyunlarını avqustun 15-də doğma meydanda keçirəcək.