Zəlzələ bölgəsində 3 mindən artıq fərdi ev tikilir
Zaqatala, 29 avqust (AZƏRTAC). Cari ilin mayında ölkənin şimal-qərb rayonlarında baş vermiş zəlzələnin nəticələrinin aradan qaldırılması istiqamətində kompleks tədbirlər davam etdirilir.
AZƏRTAC xəbər verir ki, zəlzələ bölgəsində fəaliyyət göstərən tikinti təşkilatlarından verilən son məlumatlara görə, hazırda Zaqatala, Qax və Balakən rayonlarında 3256 fərdi evin tikintisi aparılır. 2824 qəzalı ev artıq tam sökülmüşdür. Tikintisinə başlanan fərdi evlərdən 2512-də bünövrə çalasının qazılması, 2103 evdə bünövrənin betonlanması, 1783 evdə isə daş-hörgü işləri aparılır. Eyni zamanda, artıq 127 evdə dam örtüyünün quraşdırılmasına, 35 evdə isə pəncərə və qapıların qoyulmasına başlanmışdır.
Fərdi evlərlə yanaşı, bu rayonlarda, eləcə də Şəki şəhərində 36 məktəb və 1 institut filialı binalarının tikintisi də sürətlə davam etdirilir. Zaqatala rayonunun Gözparaq kəndində uşaq bağçası üçün yeni binanın inşasına başlanmışdır.
Fövqəladə Hallar Nazirliyinin (FHN) məsul nümayəndəsi AZƏRTAC-a bildirmişdir ki, mayın 18-də baş vermiş təkrar yeraltı təkanlarla əlaqədar işçi qrupları zəlzələ bölgəsində fərdi evlərə təkrar baxışları davam etdirir. Artıq 7904 fərdi evə təkrar baxış keçirilmiş, 561 evin tam qəzalı vəziyyətə düşdüyü, 2433 evin bərpa və gücləndirməyə, 2918 evin isə təmirə ehtiyacı olduğu müəyyənləşmişdir.
Ümumiyyətlə, təbii fəlakət baş verdiyi gündən indiyədək FHN-nin işçi qrupları zəlzələ bölgəsində 33717 fərdi evə baxış keçirmişdir. Məlum olmuşdur ki, zəlzələ nəticəsində bu rayonlarda 3693 ev tam qəzalı vəziyyətə düşmüşdür. 6590 evdə bərpa və gücləndirmə işləri görülməli, 11260 ev təmir olunmalıdır. Baxış keçirilmiş 12174 fərdi evin vəziyyəti qənaətbəxş hesab edilmişdir.
Bölmənin digər xəbərləri
