Zəngəzur dəhlizinin reallaşması regionun geosiyasi və geoiqtisadi əhəmiyyətini artırır - ŞƏRH
Bakı, 8 yanvar, AZƏRTAC
Zəngəzur dəhlizi Cənubi Qafqaz regionunda nəqliyyat-kommunikasiya əlaqələrinin bərpasını və inkişafını nəzərdə tutan mühüm strateji layihədir. Bu dəhliz Azərbaycanın əsas hissəsini Naxçıvan Muxtar Respublikası ilə birləşdirməklə yanaşı, region ölkələri arasında iqtisadi əməkdaşlığın və siyasi münasibətlərin yeni mərhələyə keçməsinə şərait yaradır.
Bunu AZƏRTAC-a açıqlamasında Milli Məclisin deputatı Zaur Şükürov bildirib.
Onun sözlərinə görə, Zəngəzur dəhlizinin reallaşması regionun geosiyasi və geoiqtisadi əhəmiyyətini son dərəcədə artırır.
“Siyasi baxımdan Zəngəzur dəhlizi regionda mövcud olan güc balansına ciddi təsir göstərir. Dəhlizin açılması Azərbaycanın ərazi bütövlüyünün möhkəmləndirilməsi və dövlət suverenliyinin praktik şəkildə təmin olunması baxımından mühüm rol oynayır. Naxçıvan Muxtar Respublikasının uzun illər davam edən nəqliyyat blokadasından çıxması ölkənin daxili siyasi birliyini və milli təhlükəsizliyini gücləndirir. Eyni zamanda, Azərbaycan ilə Türkiyə arasında birbaşa quru əlaqəsinin yaranması iki ölkə arasında strateji müttəfiqliyi daha da möhkəmləndirir və Türk dünyasının siyasi inteqrasiyasını sürətləndirir. Zəngəzur dəhlizi regionda sülh və sabitliyin bərqərar olunması baxımından da xüsusi əhəmiyyət daşıyır. Kommunikasiyaların açılması qarşıdurma və təcrid siyasətini əməkdaşlıq və dialoq mühiti ilə əvəz edə bilər. Bu baxımdan dəhliz Cənubi Qafqazda uzunmüddətli sülhün təmin olunmasına və dövlətlər arasında qarşılıqlı etimadın formalaşmasına xidmət edən siyasi mexanizm kimi qiymətləndirilir. Layihə, həmçinin Rusiya, İran, Avropa İttifaqı və Çin kimi regional və qlobal güclərin maraq dairəsindədir ki, bu da onun beynəlxalq siyasi əhəmiyyətini artırır”, - deyə deputat qeyd edib.
Z.Şükürov vurğulayıb ki, iqtisadi baxımdan Zəngəzur dəhlizi region üçün geniş inkişaf imkanları yaradır. Belə ki, dəhliz ticarət əlaqələrinin genişlənməsinə, tranzit daşımaların həcminin artmasına və nəqliyyat xərclərinin azalmasına səbəb olur: “Bu marşrut vasitəsilə yüklərin daha qısa müddətdə və daha az xərc tələb edən yollarla daşınması mümkün olur ki, bu da region ölkələrinin iqtisadi rəqabət qabiliyyətini artırır. Azərbaycan üçün bu dəhliz yeni tranzit gəlirləri, logistika mərkəzlərinin yaradılması və regional iqtisadi mövqeyin möhkəmlənməsi deməkdir. Zəngəzur dəhlizi, həmçinin regional iqtisadi inteqrasiyanı da sürətləndirir. Ermənistan üçün tranzit ölkə kimi çıxış etmək iqtisadi baxımdan yeni imkanlar yarada bilər, Türkiyə və Orta Asiya ölkələri üçün isə Qafqaz üzərindən daha rahat ticarət əlaqələri təmin olunur. Dəhliz Şərq–Qərb və Orta Dəhliz layihələrinin tərkib hissəsi olaraq Çin–Avropa ticarətində alternativ marşrut rolunu oynayır və regionu beynəlxalq nəqliyyat-logistika sisteminin mühüm həlqəsinə çevirir.
Nəticə olaraq, Zəngəzur dəhlizi region üçün yalnız nəqliyyat layihəsi deyil, siyasi sabitlik, iqtisadi inkişaf və regional inteqrasiyanı təmin edən strateji təşəbbüsdür. Onun reallaşması Cənubi Qafqazın beynəlxalq münasibətlər sistemində rolunu gücləndirir və regionun uzunmüddətli inkişaf perspektivlərini formalaşdırır”.
Bölmənin digər xəbərləri
