“Ölkəmizi tanıyaq”: məktəblilər IDEA İctimai Birliyinin təşəbbüsü ilə keçirilən yaşıllaşdırma aksiyasında iştirak ediblər
Aksiyada 300-dən çox ağac əkilib
Xaçmaz, 19 noyabr, Elxan Yusifli, AZƏRTAC
Noyabrın 19-da səhər saatlarında Şamaxı, İsmayıllı, Şəki, Oğuz, Qəbələ, Göyçay, Ağsu, Qobustan və Mingəçeviri təmsil edən ümumtəhsil məktəblərinin yuxarı sinif şagirdləri Quba şəhərində “Hərəmiz bir ağac əkək” devizi altında ağacəkmə aksiyasına qoşulublar.
AZƏRTAC xəbər verir ki, IDEA İctimai Birliyinin təşəbbüsü ilə keçirilən yaşıllaşdırma aksiyasında məktəblilər və onlara rəhbərlik edən müəllimlər 300-dən çox ağac əkiblər.
Ağacəkmə aksiyasından sonra “Ölkəmizi tanıyaq” maarifləndirici tur-aksiyası çərçivəsində 300-dən çox məktəbli şimal bölgəsi ilə tanışlıq çərçivəsində muzeylər və parklar şəhəri Xaçmaza gəliblər.
Məktəbliləri Xaçmaz şəhərinin mərkəzindəki Heydər Əliyev parkında rayon icra hakimiyyətinin, təhsil, mədəniyyət və turizm şöbələrinin nümayəndələri qarşılayıblar.
Rayon icra hakimiyyətinin başçısının müavini İlhamə Nəzərova ölkəmizdə gənc nəslin hərtərəfli inkişafı üçün yaradılan şəraitdən danışıb, dövlətimizin başçısının tapşırığına əsasən təşkil olunan aksiyanı məktəblilərin dünyagörüşünün formalaşmasında mühüm rol oynadığını bildirib. O, Prezident İlham Əliyevin və Birinci vitse-prezident Mehriban Əliyevanın ölkəmizdə təhsilin, səhiyyənin, mədəniyyətin və idmanın inkişafına göstərdikləri diqqət və qayğıdan bəhs edib.
Məktəblilər ümummilli lider Heydər Əliyevin abidəsini ziyarət ediblər.
Tur-aksiya iştirakçılarının diqqətinə çatdırılıb ki, Xaçmaz rayonu geniş turizm imkanlarına görə seçilən rayonlardandır. Buranı parklar və muzeylər şəhəri adlandırırlar. Bununla yanaşı, Xaçmaz ölkəmizin ən böyük kənd təsərrüfatı rayonlarından biridir.
Qonaqlar şəhərdəki yeni inşa olunan Heydər Əliyev Mərkəzində də olublar.
Daha sonra məktəblilər Xaçmaz şəhərində Azərbaycanın görkəmli şair və yazıçılarının, mədəniyyət və incəsənət xadimlərinin büstü qoyulan, açıq səma altında yaradılan Şəxsiyyətlər muzeyinə gəliblər. Ekskursiya iştirakçılarına 2006-cı ildə yaradılan muzey-park haqqında ətraflı məlumat verilib.
Tur-aksiyanın iştirakçıları 2013-cü ildə Prezident İlham Əliyevin iştirakı ilə istifadəyə verilən Xaçmaz Rayon Tarix-Diyarşünaslıq Muzeyini də ziyarət ediblər. Diqqətə çatdırılıb ki, muzeydə həm ölkəmizin, həm də Xaçmaz rayonunun tarixini əks etdirən və turistlər üçün maraq doğuran çoxlu sayda eksponat var.
Məktəblilər Xaçmaz Dövlət rəsm qalereyası ilə tanışlıqdan sonra Bayraq Meydanı Kompleksinə gəliblər.
Meydan və Çənlibel parkında gəzintidən sonra məktəblilərin ekskursiyası başa çatıb.
Bölmənin digər xəbərləri
