Akademik İsa Həbibbəyli türk dövlətləri elmlər akademiyalarının iştirakı ilə keçirilən onlayn iclasda çıxış edib VİDEO
Bakı, 21 aprel, AZƏRTAC
Qazaxıstanın paytaxtı Nur-Sultan şəhərində Beynəlxalq Türk Akademiyasının təşkilatçılığı ilə türk dövlətləri milli elmlər akademiyalarının COVID-19 pandemiyası dövründəki fəaliyyətinə həsr olunmuş onlayn iclası keçirilib.
AMEA-dan AZƏRTAC-a bildirilib ki, tədbirin gündəliyində türk dövlətlərində elmin hazırkı vəziyyəti, pandemiya dövründə qəbul olunmuş qərarların təcrübə mübadiləsi, eləcə də elmi əməkdaşlığın perspektiv istiqamətlərinin müzakirəsi yer alıb.
Konfransı giriş sözü ilə Beynəlxalq Türk Akademiyasının prezidenti Darxan Kıdırali açıb.
AMEA-nın birinci vitse-prezidenti, akademik İsa Həbibbəyli tədbirə videokonfrans vasitəsilə qatılıb. Alim tədbir iştirakçılarını salamlayaraq koronavirusun geniş yayılması ilə əlaqədar olaraq dünyada yeni bir dövrün yaşandığını, pandemiyaya dair çağırışlar sırasında özünütəcridin ön mövqeyə çıxdığını deyib. Qeyd edib ki, bu, koronavirusdan xilas yolu olsa da, təcridolunma, eyni zamanda, cəmiyyətin normal və dinamik inkişafına maneə törədir, beynəlxalq əlaqələrə böyük zərbə vurur.
Azərbaycanda koronavirus pandemiyası ilə bağlı vəziyyət barədə məlumat verən akademik İ.Həbibbəyli bu xəstəliyin yayılmasına qarşı həyata keçirilən tədbirlərin ölkə Prezidentinin nəzarəti altında olduğunu, xalqımızın bu çətin günlərdə dövlət başçısı ilə birgə həmrəylik nümayiş etdirdiyini vurğulayıb. O, işdən təcrid olunmuş əhalinin aztəminatlı təbəqələrinə - 600 mindən çox vətəndaşımıza dövlətimiz tərəfindən aprel və may ayları üçün maliyyə yardımı göstərildiyini diqqətə çatdırıb.
Bəşəriyyət üçün böyük bəla olan pandemiya hadisəsini XXI əsrin xərçəngi adlandıran məruzəçi, bu xəstəlikdən xilas olmaq üçün alimlərin üzərinə böyük vəzifələr düşdüyünü vurğulayıb: “Düşünürəm ki, bugünkü akademiyaların onlayn konfransı koronavirus şəraitində və pandemiyadan sonrakı mərhələdə elm adamlarının vəzifələrini müzakirə etmək və ortaq qərarlar qəbul etmək baxımından əhəmiyyətli platformadır”.
Alim bundan sonra elmlər akademiyaları ilə birlikdə onlayn seminarlar, simpoziumlar, təqdimatlar keçirməyin vacib olduğunu qeyd edib. Bildirib ki, eyni zamanda, elmimiz hər bir epidemiya hallarına dair uyğun proqnozlar verməyi, konkret elmi təkliflərlə çıxış etməyi bacarmalıdır. Koronavirusun yaranma səbəbləri haqqında səslənən müxtəlif versiyaları birlikdə təhlil edilib obyektiv elmi nəticələr çıxarmalıyıq.
“Müşahidələr göstərir ki, dünyada koronavirus dövrü enişə doğru meyillidir”, - deyən İsa Həbibbəyli ən qısa zamanda bu çətin və məsuliyyətli vəziyyətdən çıxaraq yenidən normal həyata qayıdacağımıza inamını ifadə edib. Qeyd edib ki, Azərbaycanda gedən prosesləri nəzərə alaraq, koronavirusdan xilas olacağımız günün çox da uzaqda olmadığını böyük ümidlə söyləmək olar.
Birinci vitse-prezident, eyni zamanda, Türk Akademiyaları Birliyinə AMEA-nın sədrlik etdiyi 2019-2020-ci illərdəki fəaliyyəti barədə hesabat verib. Akademik İ.Həbibbəyli çıxışının sonunda hər bir konfrans iştirakçısına, tədbirdə təmsil olunan akademiyaların kollektivlərinə səmimi arzularını ünvanlayıb.
Onlayn konfransda, həmçinin digər türk dövlətləri akademiyalarının təmsilçiləri çıxış ediblər. Belə ki, iclasda Qazaxıstan Elmlər Akademiyasının prezidenti, akademik Murat Jurinov, Türkiyə Elmlər Akademiyasının prezidenti, professor Əhməd Cavad Acar, Özbəkistan Elmlər Akademiyasının vitse-prezidenti Bahram Abduhalimov, Qırğızıstan Elmlər Akademiyasının prezidenti, akademik Murat Cumatayev, Tatarıstan Elmlər Akademiyasının prezidenti, akademik Myakzyum Salahov, Başqırdıstan Elmlər Akademiyasının prezidenti, akademik Alfis Qayazov pandemiya dövründə əməkdaşlıq imkanlarının müxtəlif formalarını təklif edib, ölkələrində koronavirusla mübarizə çərçivəsində görülən tədbirlərdən danışıblar.
Daha sonra Türk Dövlətləri Elmlər Akademiyalarının COVID-19 Pandemiya görüşü ilə bağlı qətnaməsi imzalanıb. Qətnaməni Azərbaycan, Qazaxıstan, Qırğızıstan, Özbəkistan, Türkmənistan, Türkiyə, Tatarıstan və Başqırdıstan Elmlər akademiyaları, eləcə də Beynəlxalq Türk Akademiyasının nümayəndələri imzalayıb. Sənəddə mövcud böhran dövründə türk dövlətlərində və respublikalarında elmi əlaqələrin inkişafı üçün irəliləyişlər etmək, elm adamlarının inteqrasiyasını dərinləşdirmək, türk respublikalarında elm adamlarının təcrübə və nəşrlərini paylaşmaq, birgə layihələr həyata keçirmək, türk dövlətləri və respublikalarında informasiya texnologiyalarının çoxistiqamətli inkişafında səyləri birləşdirmək və s. məsələlər yer alıb.
Sonda Türk Akademiyaları Birliyinə Qırğızıstan Elmlər Akademiyasının sədrlik etməsi barədə qərar qəbul edilib.
Bölmənin digər xəbərləri
