Bolqarıstanın xəbər portalı Ermənistanın ölkəmizə qarşı davam edən təcavüzü ilə bağlı məlumat yayıb VİDEO
Sofiya, 2 oktyabr, AZƏRTAC
Azərbaycanın Bolqarıstandakı səfiri Nərgiz Qurbanova Bolqarıstanın nüfuzlu “FAKTİ” xəbər portalına Ermənistanın ölkəmizə qarşı davam edən təcavüzü ilə bağlı müsahibə verib.
AZƏRTAC xəbər verir ki, sentyabrın 27-də Ermənistan silahlı qüvvələrinin atəşkəs rejimini kobud şəkildə pozaraq, təmas xətti boyunca Azərbaycan Respublikasının mövqelərini atəşə tutmasından bəhs edən N.Qurbanova Ermənistan qoşunlarının Azərbaycanın işğal olunmuş ərazilərindən tam və qeyd-şərtsiz çıxarılmasını tələb edən BMT Təhlükəsizlik Şurasının 1993-cü il tarixli 822, 853, 874 və 884 saylı qətnamələrinin hələ də icra olunmadığını diqqətə çatdırıb. Ermənistanın Dağlıq Qarabağ bölgəsindən əlavə ətrafında yerləşən və ermənilərin heç yaşamadığı yeddi rayonu işğal etməsi faktına diqqət çəkən səfir Azərbaycanın işğal olunmuş ərazilərində Ermənistan tərəfindən azərbaycanlılara qarşı etnik təmizləmə aparıldığı, burada qeyri-qanuni məskunlaşma siyasəti aparıldığı qeyd olunub. Son bir neçə gün ərzində Ermənistanın Azərbaycan kəndlərinə və mülki əhalisinə daimi atəş açdığını, mülki əhali arasında ölən və yaralananların mövcud olduğunu vurğulayan diplomat müvafiq şəkilləri əyani sübut olaraq göstərib. Bu xüsusda qeyd olunub ki, Azərbaycan tərəfi Cenevrə Konvensiyasına uyğun olaraq mülki əhalini hədəfə almır. N.Qurbanova vurğulayıb ki, əvvəlki cinayətkar hərbi xuntanı devirən Nikol Paşinyanın hakimiyyətə gəlişi ilə Ermənistanda rəhbərlik dəyişikliyi əvvəllər münaqişənin həllində müəyyən ümidlərə yol açsa da, Ermənistanın yeni baş naziri ölkədə inkişaf vədləri yerinə yetirmək iqtidarında ola bilməməsi, daxili siyasi gərginlik və xalqının narazılığı fonunda münaqişə ilə bağlı mövqeyini radikallaşıb. Bu xüsusda, ölkəmizin işğal olunmuş ərazilərində N.Paşinyanın oğlunun hərbi xidmət keçdiyi, həmçinin həyat yoldaşı Anna Akopyan və onun yaratdığı “Qadınlar sülhün tərəfdarıdır” təşkilatının üzvlərinin bir həftəlik hərbi təlimlərdə iştirak etdiyi qeyd olunub.
Diqqətə çatdırılıb ki, hələ 2019-cu ildə Ermənistan müdafiə naziri David Tonoyan Nyu-Yorkdakı erməni diasporası ilə görüşündə taktikalarının indi yeni ərazilər üçün yeni müharibə olduğunu açıq şəkildə ifadə etmişdir. Eyni zamanda, Ermənistanın yeni Milli Təhlükəsizlik Strategiyasında da Azərbaycana qarşı bu kimi aqressiv mövqe nümayiş etdirilib. Veriliş aparıcının Türkiyənin münaqişəyə cəlb olunması sualına cavab olaraq səfir guya Türkiyənin münaqişə tərəfi kimi iştirak etməsi barədə erməni tərəfinin yaydığı bütün şayiələrin təxribat xarakteri daşıdığını, Azərbaycanın strateji tərəfdaşı olmasına baxmayaraq Türkiyənin münaqişədə iştirakı etmədiyini və Azərbaycan Ordusunun öz xalqının və öz ərazisinin müdafiəsini təmin etmək üçün olduqca hazırlıqlı olduğunu qeyd edib. Bundan əlavə, Azərbaycanın Ermənistan ərazisində nə hərbi, nə də mülki hədəfinin olmadığını söyləyən diplomat BMT Nizamnaməsinin 51-ci maddəsinə uyğun olaraq Azərbaycanın özünümüdafiə və işğal olunmuş ərazilərini azad etmək hüququna sahib olduğunu vurğulayıb.
İqbal Hacıyev
AZƏRTAC-ın xüsusi müxbiri
Sofiya
Bölmənin digər xəbərləri
