Kiyevdə Ukraynada yaşayan azərbaycanlıların, diaspor nümayəndələrinin iştirakı ilə konfrans keçirilib VİDEO
Kiyev, 21 dekabr, AZƏRTAC
Kiyevdə Azərbaycanın Diasporla İş üzrə Dövlət Komitəsinin nümayəndə heyətinin və Ukraynada yaşayan azərbaycanlılar, diaspor nümayəndələrinin iştirakı ilə konfrans keçirilib.
AZƏRTAC xəbər verir ki, konfransdan əvvəl dövlət komitəsinin nümayəndələri və Ukrayna Azərbaycanlıları Radasının (UAR) üzvləri Kiyevdə ulu öndər Heydər Əliyevin adını daşıyan parkda Ümummilli Liderin abidəsini ziyarət edib, önünə əklil və gül dəstələri qoyublar.
Sonra nümayəndə heyətinin iştirakı ilə UAR-ın İdarə Heyətinin iclası keçirilib. İclasda qarşıda duran vəzifələr müzakirə edilərək yeni qərarlar qəbul olunub.
Konfrans ölkəmizin ərazi bütövlüyü uğrunda şəhid olanların xatirəsinin bir dəqiqəlik sükutla yad edilməsi, Azərbaycanın və Ukraynanın Dövlət himnlərinin səsləndirilməsi ilə başlayıb.
UAR-ın Baş katibi Ceyhun Məmmədovun moderatorluğu ilə keçirilən konfransda çıxış edən Diasporla İş üzrə Dövlət Komitəsinin Aparat rəhbəri Daşqın Rəcəbli bildirib: “Builki görüşün önəmi odur ki, ötən il Azərbaycan Müzəffər Ali Baş Komandan, Prezident İlham Əliyevin rəhbərliyi ilə 44 günlük Vətən müharibəsində Zəfər çalan ölkənin nümayəndələri kimi görüş baş tutur. Komitə rəsmisi daha sonra istər pandemiya dövründə, istərsə də Vətən müharibəsi dövründə görülən işlərdən danışıb. Qeyd edib ki, 44 günlük Vətən müharibəsində dünyanın 46 ölkəsində 500-ə yaxın tədbir, o cümlədən 111 mitinq və yürüş keçirilib, xarici mediada 600-dən çox məqalə dərc edilib”.
D.Rəcəbli vurğulayıb ki, bu aksiyalarda, tədbirlərdə əsas missiya dünyadakı diaspor təşkilatlarının üzərinə düşüb. Komitənin əsas amalı dünyadakı, o cümlədən də Ukraynadakı azərbaycanlıların güclü birliyidir. Aparat rəhbəri, həmçinin qeyd edib ki, yaxın zamanlarda UAR-ın qurultayı keçiriləcək.
Ukrayna Azərbaycanlıları Radasının həmsədri, Kiyev Azərbaycanlıları Konqresinin sədri Oleq Krapivin Ukraynadakı azərbaycanlıların son illər daha da güclənən birliyindən danışaraq bildirib ki, Azərbaycanın 30 illik işğala son qoyması, qalib ölkə imicini qazanması dünyadakı azərbaycanlılar kimi, bu ölkədə də onlara böyük stimul verir.
Radanın digər həmsədri, Ukrayna Azərbaycanlılarının Birləşmiş Diasporu təşkilatının sədri Hikmət Cavadov isə Vətən müharibəsi dövründə azərbaycanlıların Ukraynada fəaliyyətindən, qalib Azərbaycan Ordusunun diaspora verdiyi stimuldan danışıb. O qeyd edib ki, bu gün Ukrayna azərbaycanlılarının birliyi bu Qələbənin əbədiləşdirilməsi uğrundadır.
Azərbaycanın Ukraynadakı səfirliyin müvəqqəti işlər vəkili Kamal Xəlilov çıxışında pandemiya və 44 günlük Vətən müharibəsində soydaşlarımızın aktiv fəaliyyətini qeyd edib.
“Ulu öndər Heydər Əliyevin yaratdığı diaspor hərəkatı bu gün Prezident İlham Əliyev tərəfindən uğurla davam etdirilir. Ukraynada güclü diaspor fəaliyyəti mövcuddur. Səfirliklə diaspor təşkilatlarının koordinasiyalı fəaliyyəti işin effektli icrasına öz töhfəsini verir”, - deyə Kamal Xəlilov əlavə edib.
Ukrayna Azərbaycanlıları Radasının Dnepropetrovsk vilayəti üzrə nümayəndəsi Eldar Tağıyev təkliflərini səsləndirərək diasporun postmüharibə dövründəki fəaliyyətinə diqqət çəkib. UAR-ın gənclər təşkilatının rəhbəri Vaqif Nağıyev, Poltava üzrə rəhbəri Füzuli Qənbərov, Nikolayev şəhər sovetinin “Xalqın xidmətçisi” partiyasından deputatı Ramil Əmirbəyov və digərləri çıxışlarında təklif və fikirlərini irəli sürüblər.
Görüşdən sonra müxtəlif bölgələrdən gələn azərbaycanlıların iştirakı ilə Həmrəylik Günü münasibətilə bayram konserti keçirilib. Konsertdə Müslüm Maqomayev adına Mədəniyyət Mərkəzinin rəhbəri, Ukraynanın Xalq artisti Qurban Abbasov, müğənnilər Nataliya Kudryaşova, Vaqif Nağıyev və digərləri bəstəkar mahnıları ifa ediblər.
Emil Hüseynli
AZƏRTAC-ın xüsusi müxbiri
Kiyev
Bölmənin digər xəbərləri
